Mga bag-ong pulis gitambagan

Niadtong Martes Agusto 1, nanumpa ang 289 ka mga bag-ong sakop sa Philippine National Police. Human nimartsa padung sa

parade ground sa Camp Sergio Osmeña Sr. nanumpa ang mga bag-ong rekrut atubangan sa pangulo sa Police Regional Office-7 C/Supt. Jose Mario Espino.

May mga linya sa ilang gihimo nga pagpanumpa nga naghisgut nga sila magtinarong sa ilang panerbisyo isip mga alagad sa katawhan. Sayod ta nga daghan sab sa mga sakop sa PNP ang nahisalaag sa hiwi nga dalan mao nga ang mga bag-ong rekrut gipahinumduman nga sa higayon nga mahuman sa ilang training ug magsugod na pagpatuman sa balaod likayan kanunay ang pagpabadlong. Sama sa pagpangurakot ug ubang buhat nga makaguba sa imahen sa PNP.

Daghan ang nasilotan nga naglakip sa pagka tangtang sa serbusyo tungod sa pangurakot. Sa akong pagdukiduki dunay mga kaso sa pangurakot nga nagsugod sa ginagmay hangtod nga naanad kay wa masakpi ug wa sab gireklamo nahimong dinagko.

Tungod sa panginahanglan sa kuwarta natintal ang uban. Ang uban nabulit sa utang ug kining utanga nagsugod gani niadtong panahon nga sila nag bansay-bansay. Tungod kay nakapanumpa na nahimo silang kuwalipikado sa pagpangutang sa mga institusyon nga nagpahuwam og kuwarta.

Ang uban nanghuwam kay ibayad sa giutang nga mga personal nga gamit sama sa bagong armas, sakyanan ug bisan unsa nalang nga wa gani kinahanglana sa ilang pagka pulis. Kay apiki sa mga bayrunon dunay uban nga way kahadlok sa pagpangutang.

Human makautang dinhi nagsugod ang labad sa ulo asa og ibayad. Sa mga iligalista ang nahimong dangpanan nga abtik sab kaayong motunol bisan pila basta kapanalipdan lang ang ilang iligal nga negosyo.

Busa ang giingon sa ilang mga labaw di magpatuyang sa pagpangutang aron di masikwati ang binuwan nga kinitaan.

Matod sa pangu sa Regional Training Center Supt. Nervin Ricohermoso, naghimo silag programa nga mamonitor ang kinitaan sa mga bag-ong rekrut.

Matod niya ilang paninglan sa resibo sa ATM ang mga rekrut pagmatuod nga sa matag suweldo may P2,500 sila nga tinigom. Niingon si Ricohermoso gusto nila nga ma-manage sa mga rekrut ang ilang kinitaan. Sa ingon niini nga paagi magserbisyo sila nga di daling matintal pinaagi sa pagpangayo og kwarta gikan sa ilang mga dinakpan.