I’ve grown enough
Milingkod si Ate Renren sa ngilit sa iyang kama. Nagpadayon kog hilak. Gisakitan gyud ko.
“Pasayloa ko, MayAnn, nga wa ko itug-an nimo ang bahin namo ni Jonar. Di ko gusto nga sakitan ka. Mao sab ni ang rason ni Jonar kon nganong gililong niya nimo ang among relasyon.”
“Unsa man diay ning gibati ko ron, Te? Sakit gyud kaayo, uy! Karon moingon ka nga
puppy love ning gibati ko kang Jonar? Mobati kaha kog ingon ani kasakit kon di pa true love ang feeling ko niya?” “I’m really sorry, MayAnn.” Nahilom na lang ko kay naghilak na sab si Ate Renren. Milingkod ko sa iyang tupad. Naluoy ko sa akong Ate. Di ko gusto nga maguol siya kay gipangga kaayo nako siya. Naghingus-hingos ko nga nagpamahid sa akong mga luha.
“Wa ko magdahom nga maingon ta ani, MayAnn. Usa ka laki ang atong gimahal. Dako na gyud ka. Mitubo na gyud ka hangtod ang imong kasingkasing. Mituo na ko nga
true love nang imong gibati kang Jonar. But I really love him, too.”
Mibakho si Ate. Naghilom ko.
“Moadto ko sa Ormoc. Sa ilang tiya. Adto ko mopadayon pag-eskuwela aron katagaan og higayon ang imong
love kang Jonar. Magpahilayo ko niya.”
Nakatan-aw kog dugay kang Ate. Ning tungora, iyang gikuptan ang akong kamot.
“Isakripisyo ko ang akong gugma niya, MayAnn, tungod nimo.”
Nasuta ko karon nga gipangga gyud ko ni Ate. Di siya selfish. Ako, unsa man? Mitindog ko ug mihigda sa akong kama.
Nagbuntag kong way tulog. Sa paghunahuna ko sa akong gugma kang Jonar ug ang pagkapakyas ani. Ug ang paghunahuna ko sa pagbiya ni Ate Renren aron paghatag og higayon nga higugmaon ko ni Jonar.
Nakamatikod ko sa pagbangon ni Ate. Migawas siya sa among kuwarto. Klaro nga maligo siya kay gidala man niya ang iyang tualya. Nagpabilin kong naghigda. Wa ko ganahing mobangon. Nakadesisyon ko nga di moeskuwela.
Pagbalik ni Ate og sulod sa kuwarto, gigakos ko siya. Naghilak ko.
“Ayaw pagbiya nako, Te. Mas bililhon ka nako kay kang Jonar.”
Sa milabay nga mga adlaw, inanay ko nang nadawat nga si Jonar di para ako. Nalipay na lang ko kay napunta siya kang Ate Renren. (KATAPUSAN)