CASIMERO VS. SULTAN
Supporting sa Melindo-Budler world title fight, Sept. 16
Human sa taas nga panahon nga pagtimbang-timbang, ang ALA Promotions nipabuhagay nga niabot na ang panahon nga magparang ang pulos Pinoy nga boksidor sa usa ka world title eliminator.
Kagahapon sa press conference sa St. Mark’s Hotel, opisyal nga gianunsyo ni ALA Promotions president Michael Aldeguer nga magsangka sila si ALA fighter Jonas “Zorro” Sultan ug two-time world boxing champion Johnriel “Quadro Alas” Casimero alang sa International Boxing Federation (IBF) super flyweight title eliminator bout.
Ang modaog ning awaya mao ang mahimong mandatory contender ni IBF super flyweight champion Jerwin Ancajas, kinsa usa usab ka Pinoy.
Ang gikaintapang away nila ni Sultan ug Casimero maoy top supporting bout sa title defense ni IBF light flyweight champion ALA fighter Milan Melindo batok South African Hekkie Budler sa Pinoy Pride 42 karong Septiyembre 16 sa Waterfront Hotel sa Lahug, dakbayan sa Sugbo.
“It took us a lot of time to make this decision. We thought the Philippine is ready to stage this kind of event. This is something new and we found out everybody is exciting about it,” matod ni Aldeguer.
Gihimong ehemplo ni Aldeguer ang nahitabo kaniadto sa init nga panagribal sa Mexican fighters nga sila si Juan Marco Barrera ug Erik Morales.
“We want to show the world that we have also great fighters not only Manny Pacquiao. Why Filipino versus Filipino? It has come to the point that we passed that already. This is a new dimension of Philippine boxing,” dugang ni Aldeguer.
Gipasabot ni Aldeguer nga ang kampo ni Casimero wala sab magmakuli sa paghangop ning maong hagit.
Giklaro ni Aldeguer nga mismong ang IBF mao ang nihatag og kamanduan nga iparang sila si Casimero ug Sultan.
Alang kang Aldeguer, wala kini nila gipalabay kay parehong angayan hatagan ning maong oportunidad ang duha ka mga boksidor.
Si Casimero, kinsa kanhi IBF jr. flyweight champion ug kasamtangang flyweight king, tatawng nakabintaha sa kasinatian apan ang kampo ni Sultan adunay nakitang bintaha sa ilang batos.
“Nindot ning awaya kay pareho ang duha ka fighters nga adunay kaisog ug kusog. Mas taas og experience si Casimero pero mas quicker si Sultan,” pasabot ni ALA gym head trainder Edito Villamor.
Si Casimero naggunit og 243, 15KOs nga rekord samtang si Sultan aduna’y 13-3, 9KOs nga baraha.