SIGARILYO GIDILI NA SULOD SA CPDRC
Dili na itugot ang pagpanigarilyo sud sa mga selda sa Cebu Provincial Detention and Rehabilitation Center (CPDRC).
Si Robert “Bobby” Legaspi, officer-in-charge sa CPDRC, nibutyag nga magpili og dapit sa quadrangle si Gobernador Hilario Davide III diin mamahimo manigarilyo ang mga piniriso.
Matod niya inay idili ang pagpanigarilyo sa tibuok pacilidad, ang gobernador nimando nga sa mga selda kini idili.
“The governor understands it's hard because we will have to address the withdrawal syndrome,” dugang ni Legaspi.
Samtang, giuyonan na ni Davide ang hingpit nga pagpasira sa canteen sud sa provincial jail.
Si Legaspi nibutyag nga gi- review na sa Kapitolyo ang gidaghanon sa mga jail guards sa CPDRC.
Siya namulong nga kasohan nila sa Committee on Discipline and Investigation ang 10 ka mga jail guard nga gidudahan nga nakigkonsabo og mga piniriso sa pagpalusot og mga kontrabando.
Ang jail guards, matod niya, ipaubos sa preventive suspension hangtod dunggon sa Codi ang ilang kaso.
Siya nidugang nga gipatiwas na lang ang supply o stock nga naa sa canteen ug sa higayon mahurot na kini, wala nay itugot nga delivery.
Ang Task Force CPDRC nirekomendar sa pagparelibo sa pwesto sa 10 ka mga jail guard tungod sa pagduda nga sila nakigkonsabo sa mga piniriso human P260,000 nga balor sa shabu ang nakuha sa hiniusang operasyon sa kapulisan ug Philippine Drug Enforcement Agency gikan sa tray og itlog atol sa greyhound niadtong Martes.