May misuway sa pagpangilad sa Lingap Masa
Sa matag 10 ka tawo nga mangayo og tabang aron makakuha og libreng tambal sa programa sa Department of Social Welfare and Developement (DSWD) 7 nga “Lingap sa Masa,” usa ngadto sa duha niini nagdala og peke nga resibo.
Kini ang gibutyag ni Timotea Gadapan, Social Welfare and Development (SWAD) Cebu Team Leader, sa Superbalita Cebu human sila hingpit nga nagsugod sa usa sa programa sa ilang ahensiya.
Niadtong Mayo ning tuiga dihang hingpit na nga aduna'y nahatagan og hinabang nga libreng tambal ubos sa maong programa.
Matod ni Gadapan nga P18 milyones pa lang ang ilang napagawas nga kwarta gikan sa P131 milyones nga budget alang sa Central Visayas
Sa Sugbo, ang Vicente Sotto Memorial Medical Center (VSMMC) pa lang ang aduna'y memorandum of agreement sa DSWD 7 nga partner niining Lingap sa Masa.
Kini nagpasabot nga kon magpacheck- up ka sa VSMMC, mamahimo ka nga makakuha usab og libre nga tambal ubos usab sa prescription sa doktor sa maong tambalanan.
“Akong awhag sa publiko nga adto sila magpa- check-up sa Sotto, kay di man mi modawat og prescriptions from private or outside,” dason niya.
Dugang niini nga bisan paman og maayo ang tumong sa gobyerno niini, aduna gihapo'y mopahimulos niini nga dili maayo.
Susama nalang nianang magdala og peke nga resita aron lang makakuha og tambal susama sa maintenance aron mabaligya.
Hinuon giklaro ni Gadapan nga aduna'y SWAD officers nga mo- assess unsa sa dokumento sa dili pa sila moaprobar sa libre nga tambal.
Hangtod anaa kini sa mga botika nga partners nila, mamahimo kini nila nga maabagan o mahatag nga libre.
Lakip sa mga botika nga aduna'y MOU sa DSWD 7 kining Rose Pharmacy; Mom's Pharmacy sa Ramos, Cebu City; Generika sa Bogo City; ug kining chemo drugs suppliers.
Sa matag pasyente, mamahimo nga mangayo kini'g tabang ubos sa Lingap sa Masa, usa matag tulo ka buwan ug dili molapas sa P75,000 ang tambal matag pasyente.
Anaa na sulod sa Sotto ang SWAD officer aron mo- assess ug mo- approve sa maong libre nga tambal.
Pagdala lang sa medical abstract ug prescriptions gikan sa VSMMC, barangay indigency/residency certificate, authorization sa pasyente ug ID.