5 ka balay naugdaw sa sunog sa Brgy. San Isidro

Atong giilisan kay lisod man sab og di nato ilisan kuwang nabiya ta daan. - Almond Dela Pena

Lima ka mga panimay ang hingpit nga naugdaw, samtang usa ang naangol human nibuto ang high

tension wire sa Visayan Electric Company (Veco) sa Isla Verde, Barangay San Isidro, dakbayan sa Talisay niadtong Biyernes sa hapon.

Sigon sa report, matod ni SFO2 Rodulfo Luage sa Talisay City Fire nga kalit lang nga nibuto ang high tensiyon

wire nga nagkutay sa maong dapit.

Matod pa nga ang kable adunay dakong boltahi sa kuryente ug naigo sa balay sa usa ka Joel Francisco, hingkod ang panuigon, maoy hinungdan sa pag-ulbo sa sunog.

Ang kayo nidali nikaon sa mga kasikbit nga kabalayan nga ginama usab sa light materials.

Si Francisco ang gikatahong napaso sa iyang bukton ug daling gidala sa Talisay District Hospital tungod sa kakalit sa panghitabo ug kadali sab nga gilamoy sa kayo ang iyang panimay.

Ang kayo daling nakadako hinungdan nga laing upat ka panimay nga pulos ginama sa light materials ang naapil sa pagkasunog.

Hinuon, ang sunog gibutang lang sa 1st alarm ang gibanabana nga danyos nga moabot lang sa P5 mil.

Gumikan sa pagkaputol sa kable sa Veco nakasinati og pawong, siga, pawong, siga ang halos tanang barangay sa Talisay, apan nabalik ra usab paglabay sa pipila ka mga oras.