Gihilam-os lang ang kauwaw
Matag higayon nga adunay motumaw nga dakong isyo kabahin sa illegal nga drugas sama niadtong mahitabong pagronda ug pagpamusil patay sa mga Parojinog family didto sa Ozamis City, dili gyud kalikayan nga mobalik na usab pagsibaw ang mga pangalan nila ni businessman Peter Lim, kanhi Cebu City Mayor Mike Rama ug Daanbantayan Mayor Vic Loot. Ngilngig man sab ning media sa Cebu nga ila mang i- localized ang panghitabo sa laing lugar.
Ang tulo apil sa listahan ni Pres. Rodrigo Duterte sa mga personalidad nga nahilambigit sa illegal nga drugas. Si Lim, matod pa, usa ka druglord samtang sila si Rama ug Loot mga drug protectors o nahilambigit sa narco-politics. Human sa nahitabo sa Ozamis City diin napatay si Mayor Reynaldo 'Aldong' Parojinog ug ang iyang mga sakop sa pamilya ug mga bodyguards, gikuhaan silag reaksiyon si Lim, Rama ug Loot. Si Lim mi-ingon nga nahadlok siya sa iyang kinabuhi samtang si Rama ug Loot mi-ingon nga wala sila mabalaka.
Hangtod karon wala pa gihapon mapasakai ug kaso ang tulo. Si Lim gipadad-an na ug subpoena sa Department of Justice alang sa usa ka imbestigasyon karong Agusto 14. Ambot ug mosaler ba kaha kining kaso ni Lim nga wala may ebendensiya. Puro ra man tabi-tabi ug huhungihong.
Nanghimakak gyud silang tulo sa ilang kalambigitan sa illega nga drugas. Si Mike naka-diin-diin nag doul ug mga ahensiya sa gobiyerno ug mga religious leaders aron motabang kaniya nga malimpiyuhan ang iyang pangalan. Pero wala gyud. Si Loot sigeg lang pamakakak.
Pero matinu-od man o dili kining maong nga akusasyon, guba na ang ilang nga imahin ug kredibilidad labi pa nila ni Mike ug Loot nga mga pulitiko. Gihilam-os lang nila ang kauwaw. Dako ning kalbaryo alang kanila. Daw nagpas-an skla ug dakong Krus nga sama sa kabug-at sa Krus nga gipas-an ni Hesu Kristo didto sa bukid sa Gulguta. Panahon ra ang nasayod kon kanus-a nila matubos ang ilang kaugalingon sa mga mata sa katawhan.
(bobbygnalzaro@