Lalis na sab

Dunay posibilidad nga malangay ang pagpatuman sa Bus Rapid Transit (BRT) samtang gi-evaluate pa ang Light Rail Transit (LRT). Matod sa taho nga nagkutlo kang Jonji Gonzales, chief of staff ni Presidential Assistant for the Visayas Michael Dino, nga “put on hold” ang BRT nga iyang gibase sa sulti ni Socio Economic Planning Ernest Pernia.

Kining posibleng pagkauktaba na usab sa BRT nga gipaabot nga mosulbad sa kahuot sa trapiko nagpataas pa sa kalbaryo nga dugay nang giantos sa mga Sugboanon.

Bisan basehan pa ang gisulti sa usa ka giingong eksperto nga di makasulbad ang BRT sa trapiko tungod kay gagmay ang mga karsada, di kalikayan nga kadudahan nga pulitika na usab ang nagpaluyo ning pagkapukgo sa pagpatuman ning mao nga matang sa transportasyon.

Ning nakalabay nga mga adlaw, nagkainit ang sinukliay og mga pamahayag nila ni Mayor Tomas Osmena ug Dino.

Nisangko kini sa lalis kon angay bang ipadayon ang BRT o di, nga gastuhan og P16 bilyunes. Si Osmena gusto nga mapatuman ang BRT nga giduso niya sukad pa niadtong dekada 90.

Nia na usab ning lalis sa mga pulitiko. Nag-contest kinsay sakto ug kinsay tuohan nila sa publiko.

Nganong maglalis pa man kon unsay angay o di? Kining BRT ug LRT gilantaw nga mopaminos sa mga sakyanan sa karsada nga maoy labing dakong hinungdan sa paghuot sa atoang kadalanan. Unya, di man usab kini sila magsapaway kay sa pasiunang mga plano, managlahi ang ilang mga rota.

Ning nahitabo karon, sama rag nibalik kita sa uno samtang ang suliran sama sa usa ka sakit nga nakalamay na og maayo, apan gilalisan pag unsay itambal.

Mahimo man nga ang usa ka sakit dapatan og lainlaing tambal. Ang suliran sa trapiko masulbad pinaagi sa nagkadaiyang mga paagi.