Paminawa Siya
Aduna ka bay kinaham nga linya sa Ebanghelyo kun sa Bibliya?
May kaila ako nga ang iyang paboritong linya mao kadtong nagkanayon nga si Jesus mao “ang dalan, ang kamatuoran, ug ang kinabuhi…” Mao kuno kini ang iyang gabay sa pagbalik sa Dios kon, matag karon ug unya, mahisalaag siya o makasala siya. Ang mahisalaag nisimang ang dalan, naglibog, o nawad-an og umoy sa kinabuhi. Dalan, kamatuoran, ug kinabuhi si Jesus.
Sumala ni San Pablo ang pulong sa Dios mao ang “espada sa Espiritu”. Sa tinuoray lang, ang mga linya sa Bibliya mapatik sa alimpatakan sa mga himasa sa Bibliya o, almenos, motambong sa Misa diin gisangyaw ang pulong sa Dios. Bisan gani ang mga pulong sa pari sa konsagyasyon, “Kini ang akong lawas nga itugyan alang kaninyo,” gikan sa Bibliya ug angay lamang nato kining hinumdoman aron madasig kita sa iyang gugma nga minghatag sa kaugalingong kinabuhi.
Nindot isag-ulo ang pipila ka mga linya gikan sa Bibliya ug patuhopon kini sa atong kinabuhi. Naa baya gyoy motuhop sa alimpatakan ug hunahuna sa tawo. Pananglit kanang mogamit ta sa internet lainlaing butang ang buot motuhop kanato. Naay maayo ug maanindot; naa say ngil-ad ug makadaot. Gani naay mahaylo sa terrorismo tungod sa ilang nabasa sa internet. Dili kini “neutral.”
Diha sa ebanghelyo nagpadayag si Jesus sa iyang pagka-Dios didto sa usa ka bungtod. Mihayag ang iyang sapot. Misidlak ang iyang panagyaw sama sa adlaw. Giduaw siya ni Moises ug ni Elias, ang Binasi sa Daniel 7:9-10,13-14; Salmo 97; 2 Pedro 1:16-19; ug Mateo 17:1-9 duha ka simbolo sa Israel ug sa pangandoy niini nga matuman ang mga saad nga gihimo sa Ginoo ngadto kang Abraham. Milanog pa gyod ang tingog sa Amahan gikan sa mahayag nga panganod: “Kini mao ang pinalangga kong Anak nga akong gikahimut-an. Pamatia ninyo siya.”
Mamati ta sa pulong. Si Jesus ang Pulong sa Dios. Siya ang pulong nga nahimong tawo.
Ang nahitabo ni Jesus didto sa bungtod masabtan diha sa libro ni Daniel. Usa kini usa ka pagpadayag sa Dios nga gitawag og “Ang Karaan.” Naglingkod Siya sa iyang trono ug Iyang sapot sama sa kahayag sa niyebe. Nagdilaab sa kalayo ang iyang trono ug di-maihap nga nangalagad Kaniya. Nakita usab ang usa nga sama sa Anak sa tawo nga gihatagan sa Ginoo og susamang katungod ug himaya. Tataw nga ang nahitabo kang Jesus usa ka pagpadayag sa iyang pagka-Dios.
Nahinumdoman ni Pedro ang maong kasinatian uban ni Cristo didto sa bungtod. Mabasa kini sa iyang ikaduhang sulat. Gimatuod niya nga sila mismo sa iyang mga kauban nakadungog sa maong tingog. Nagbaton sila og proptikanhong mensahe nga masaligan ug angayng paminawon kay mohatag kinig dan-ag sama sa pagsubang sa bituon sa kadlawon.
Way hunong ang atong pagtuon sa pulong sa Dios diha sa Bibliya ug sa Simbahan. Sa pulong pa ni San Jeronimo, “ang si bisan kinsa nga ignorante sa Bibliya, ignorante usab kang Jesus.” Kon buot nato makabaton og tinuoray nga kabag-ohan, magsugod kita sa pag-ila-ila kang Jesus.
Paminawon nato siya.