Politika sa BRT ug LRT
Daw nagtuo kining nagsigig babag sa Bus Rapid Transit (BRT) nga nalipay ang mga Sugboanon ug magamit kini isip puhonan alang sa 2019.
Ang labing ulahing kalamboan mao ang pag-usab sa hunahuna ni Socioeconomic Planning Secretary Ernesto Pernia tungod sa mga paninguha ni Presidential Assistant for Visayas Mike Dino.
Niagi na na man unta ang BRT og mga makuting pagtuon sa mga eksperto sa Neda, DOTr, ug sa World Bank. Gilangay sa panahon ni PNoy apan dihang naa na sa poder si Presidente Rodrigo Duterte, iya kining giuyonan ug magsugod na ang kagamhanan sa pagpatuman niini.
Kon tan-awon pagtarong, di man conflict ang BRT ug LRT. Mas bentaha pa gani sa Sugbo kon naay BRT ug LRT kita.
Apan kalit nga nitumaw kining interesado modagan pagka mayor karong 2019 ug niingon mas maayo ang iyang giduso nga Light Rail Transit (LRT). Grabing babag ang gibuhat batok sa BRT.
Di ko motuo nga teknikal ang hinungdan sa pag-usab sa hunahuna ni Pernia.
Basi sa mga nangguwa sa mga balita ug sa social media, balik-balik lang ang mga argumento nga giisa batok sa BRT nga dali kaayong nasupo ug natapi.
Kining maong kahimtang maoy nakapakumbinser nako nga politika lang gyud ug pangintriga lang gyud kining kampanya batok sa BRT.
INTRIGA LANG Makahinumdom ko nga
politikanhong intriga lang ang nakapatangtang kang Koko Holganza isip district collector sa Customs nga maoy nakapa-number one sa Port of Cebu sa collections sa 2016.
Nakahibawo ang mga taga pantalan nga si Holganza nisuporta kang Mayor Duterte panahon sa kampanya. Apan gipalakaw ang intriga nga dakong bakak nga siya “Yellow.”
Mao sab ang nahitabo sa Cebu bureau sa Philippine News Agency (PNA). Gipaninguha nga di makasulod isip bureau chief ang aktibong sakop sa Duterte Media Center panahon sa kampanya.
Atong nasayran nga ang naabot nga intriga sa Manila ug kadagkuan kay kuno “Yellow.”
Mao nga dili ko mahibulong nga intriga lang gyud bunga sa politika kining gipalakaw sa kaulohan aron mababagan ang BRT.
Subo palandungon nga dunay mga opisyal sa kaulohan nga dali kaayong mailad sa mga politikanhong intriga.
Ang ako lang madugang nga usa sa makapakgang sa ingon niini nga politikanhong pangintriga mao ang pagbonggo niini ug sa pagpadayag sa mga Sugboanon nga wala kita makauyon niining pagbabag sa BRT.
LIBRE NA
Salamat Presidente Duterte sa pagpirma aron mahimong balaod ang paglibre sa tuition sa mga state university sa tibuok nasud. Gibuhat kini niya bisan sa pagsupak sa iyang mga economic managers sama kang Pernia nga mubo lang og panglantaw sa kalamboan sa nasud.
(@anol_cebu sa Twitter)