Action movie mabuhi sa `Double Barrel’

Subling mabuhi ang action movies, pinaagi sa pelikulang Double Barrel ni AJ Muhlach. Dugay-dugay naman sab tang wa makakita ug pelikulang aksyon, mao nga karon biyaan ni AJ Mulach ang iyang imahe isip boy next door kay sa umaabot nga pelikulang "Double barrel: sige iputok mo" sa Viva films sa direksyon ni Toto Natividad ilusad si AJ isip ang pinaka-bag-o ug batang action star.

Ang makapartner ni AJ dinhi mao ang sexy actress nga si Phoebe Walker, ang best supporting actress winner sa miaging 2016 Metro Manila Film Festival sa horror movie nga "Seklusyon".

Grabeng fitness training ang gibuhat dinhi ni AJ ug diet para mahimong fit ang iyang lawas ug moha-om sa maong papel.

Sa wala pa niabot kining big break sa ulitawo migawas na sab kini sa pelikulang "Diary nang pangit", "Talk back and you're dead", "Chain mail", "Felix Manalo" ug uban. Daghan na usab kining naapilan nga mga teleserye. Sa pelikulang "Double barrel:iputok mo" magtiayong birador ang ilang papel.

Si AJ usa ka drug pusher nga nadakpan sa mga pulis sa anti drug operation, nagpakilooy siya nga dili patyon maong gihimo siyang asset nila.

Si Phoebe ang iyang asawa ug tungod sa iyang dakong gugma sa lalaki, mi-unong kini sa iyang bana hangtud nga silang duha na mismo ang mopatay sa mga nailhang drug lords.

Base sa tinood nga istorya ang pelikula nga puno sa bakbakan, ginukdanay sa mga sakyanan ug puno sa maaksyong mga eksena nga in-fairness dili pod magpalupig sa mga sikat nga Hollywood action movies.

Kauban usab nila dinhi ang action icon niadtong 90's nga si Jeric Raval ug ang mixed martial arts expert nga si Ali Khatibi.

Labi pang atangan kini sa mga barako kay may sobrang init nga love scene dinhi silang AJ ug Phoebe. Ang "Double barrel: iputok mo" showing na karong Agosto 9, ay'g saba!