Biseklita sa Guangzhuo
Sa miaging semana, nakaduaw ko sa ikatulong labing dako nga siyudad sa China-Guangzhou, nga mas nailhan nato nga Canton. Ang labing dakong siyudad sa mainland China mao ang Beijing, gisundan sa Shanghai ug ikatulo ang Guangzhou.
Una nakong nabantayan sa paggawas namo sa Baiyun International Airport mao ang kalapad sa ilang mga karsada. Ang
traffic manageable kaayo. Dali ka rang maibot gikan sa ilang mga karsada. Lain nakong nabantayan mao nga way motorsiklo. Bisan giunsa nakog lingi, wa ko makakita og motorsiklo.
Paggawas na namo sa expressway, pagsulod namo sa city center, ang akong nakit-an mga biseklita ug electric bikes. Wa gihapoy motorsiklo. Mao diay kay gi-ban sa kagamhanan ang mga motorsiklo sa kinapusoran sa siyudad. Kini tungod sa kadaghan sa mga aksidente ug polusyon.
Sukad giwagtang ang mga motorsiklo, niminos og maayo ang mga aksidente.
BISEKLITA
Ang akong gikalingawan pagtan-aw mao ang mga biseklita, kadaghanan naa ra sa daplin sa karsada kun sidewalk. Bisan asa nga dapit naay mga biseklita nga imong masakyan.
Gikinahanglan nga duna kay smartphone, account sa Wechat ug dunay load nga yuan (kwarta sa China) ang imong account. Kuhaan nimo og hulagway ang QR code, mobayad ka sa Wechat.
Ang lock sa biseklita moabli. Pwede na nimong sakyan ug sikaran. Balor lang og P7 matag oras sa atoang kwarta ang bayad. Mahimo ra nimong biyaan sa dapit diin ka gustong mokanaug. Mahimo ra sab ning gamiton sa laing tawo.
Wa silay arte sa biseklita. Daghan sa mga babaye didto nga mag-blouse, magsayal u gang uban magdala pag masuso, nga motindak sa karsada. Naay koy mga hulagway nga wa pa nako mabutang sa Facebook.
SIDEWALK
Ang ilang mga sidewalk grabe sab ka lapad. Bale og labing minus duha ka mga lane sa atoang karsada ug wa pay sidewalk vendors. Sa ilang sidewalk, mahimong makaagi ang mga biseklita ug e-bikes.
Sa ilang traffic law, ang mga e-bike ug biseklita pwede rang di motuman sa traffic lights. Maka counterflow, makatabok sa karsada bisan green ang suga sa traffic light ug mahimo rang moagi sa pedestrian lane.
Nagrepstehay usab ang mga driver didto. Tagsa rang mogamit og busina, di sama diri sa atoa nga grabe ang kalangas sa dan.
Sa ilang Beijing Road, nga bersyon sa Time Square sa sa New York, way bisan us aka sakyanan ang makasulod. Lapad ang karsada nga gitaliwad an sa dagkong shopping malls.
Kitang magsigeg panaway sa China nga bati, mausab ang imong huna-huna. Just imagine, pil-on ang Cebu City og kanapulo kon development ang hisgutan. Layo usab kaayo kon kamoderno sa ilang mga dan ang hisgutan.
Sa akong nakit-an, ang biseklita ug e-bikes maoy future nga sayon nga ordinaryong transportasyon. Futuristic diay tang mga tigbiseklita.