IKADUHANG 'ANGHEL'

Hulyo 20, 2015 ang usa sa mga petsa nga mitatak sa kasingkasing ni Jeneffer Bacatan-Amancia.

Sa maong adlaw, nabutang sa peligro ang iyang kinabuhi sa pagpanganak sa iyang ikaduhang anak nga babaye nga si Jazznelle Fe Amancia sa usa ka pribadong tambalanan sa siyudad sa Sugbo.

Ang bata nahimugso alas 6:38 sa gabii.

Kini ang ikaduhang higayon nga gipaubos si Jeneffer sa Caesarean Section.

Ang kamaguwangan nga anak niini nga si Janine Fe kay nahimugso pinaagi usab sa Caesarean Section.

Kini tungod kay delikado ang kahimtang ni Jeneffer sa pagpanganak kay mosaka ang presyon sa iyang dugo ug maglisod siya sa pag-utong.

Karong bag-o, gisaulog ni Jazznelle, kinsa gianggaan usab og Mamoy, ang ikaduhang kasumaran sa iyang adlaw nga natawhan.

Ang birthday sa bata gisaulog duha ka adlaw gikan sa adlaw nga siya gipanganak.

Ang bata gihulagway ni Jeneffer nga luhagan, kiatan ug papa's girl.

Siya niasoy kon molakaw ang iyang bana nga si Felicidario o kon duna kini paliton sa tindahan, ang bata kanunay mouban.

Si Felicidario ang naghatag sa pangan nga Jazznelle Fe ngadto sa ilang anak.

Ang birthday ni Mamoy gisaulog pinaagi sa pagsimba sa pamilya, pagpanuroy ug pagsalosalo sa pagkaon kauban sa mga higala ug silingan. /