SG HARI SA EMIL'S CUP

Human sa makutas nga kombati, nalangkat sa SGARQ Builders ang kampyonato sa 10th Emil’s Fresh Chicken Fiesta Cup basketball tournament pinaagi sa pagpukan sa San Remegio Properties, 109-104, sa gipunsisukan nga Minglanilla Sports Complex, lungsod sa Minglanilla niadtong Biyernes sa gabii.

Si Emmanuel Calo mipabuto og pito ka tres sa iyang 27 puntos aron giyahan ang Builders ni coach Marvin Caro ngadto sa ilang unang kampyonato sa maong torneyo nga isip usa sa mga kalihukan sa kapistahan ni Sr. San Roque sa brgy. Linao-Lipata sa maong lungsod.

Nipakita man tuod og igong dominasyon ang SG sulod sa sayong bahin human kini makaposte og 10 puntos nga labaw, apan nakabaton kini og grabing pagpanghudlat sa uwahing hugna sa panag-engkuwentro.

Gikan sa 89-79 nga bintaha nga gidibuho nila ni Calo, Jojo Tangkay ug Ferdinad Lusdoc, sa kalit lang namugnaw ang Builders sa katapusang kuwatro minutos kapin ang nahabilin sa fourth quadter.

Ning higayona, nanginit na usab ang opensa nila ni Ralp Olivares, Adrian Lao ug Paul Desiderio ug mipahagsa kini og dakong rally nga nagtabla aron tablahon ang score sa 93-93.

Nainat man tuod pagbalik SG ang ilang bintaha, 99-95, apan wa kini makapalurang sa determinasyon sa batan-ong San Remegio kinsa nadasig sa presensiya sa ilang bigboss nga si Mark Ynoc.

Human nakamugna og krusyal nga turnover si Tangkay sa dihang nawad-an siya sa pagkontrolar sa bola, wa usab mag-usik og panahon ang San Remegio ug ang duha ka sunodsunod nga layup ni Adrian Lao maoy nakapasikit og balik sa duwa, 100-101, sa nahabiling 44.3 segundos nga nakapahugyaw sa mga tawo.

Apan kadto ray katapusang hudlat nga nahimo sa mga batos ni playing-coach Randy Colonia human ang sentro sa SG nga si Rhino Berame ang sulagma nga mipasulod og duha ka sunodsunod nga itsa nga maoy wanang sa dalan ngadto sa ilang kadaugan.

Miduyog ni Calo sa mythical five, mao sila si kanhi Batang Gilas mainstay Paul Desiderio, Ralp Olivares, Ferdinand Lusdoc ug Berame.

Sa sayo pa, nakaeskapo ang Fighter Wine sa katapusang hunat sa Samsam Gullas, 104103, aron angkunon ang ikatulong dapit.

Gawas sa championship trophy, ang SG, third placer sa niaging tuig, nakadawat usab og P110,000 nga cash prize ug ingon man laing P10,000 nga per win bonus samtang mibulsa ang San Remegio sa P50,000 ug tropeyo.

Ang Fighter Wine miuli nga may P30,000 cash ug laing P5,000 alang sa per win bonus.