P7 M NGA GIDILING DRUGAS NASAKMIT

Nikabat sa P7 milyunes nga kantidad sa shabu ang nasakmit gikan sa lima ka mga tawo nga naglakip sa 16-anyos nga batang babaye sa dakbayan sa Mandaue ug lungsod sa Compostela sulod sa duha ka adlaw nga operasyon.

Dul-an sa 600 gramos ang nakuha sa Mandaue City Police Office (MCPO)-City Intelligence Branch (CIB).

Si MCPO Director Roberto Alanas niila sa mga suspek nga sila si Regine Barrera Alinsug, 23; Jennyviev Alemento Perales, 18; Jason Barrieto Damole, 38; Kimberly Camero Avil, 20; ug 16-anyos nga batang babaye.

Ang mga hamtong dunay koneksiyon sa drug personalities sa Mandaue City Jail (MCJ) ug National Bilibid Prison sa Muntinlupa City, matod ni Senior Insp. Marvin Figaredo, CIB deputy chief.

“Naningkamot mi nga mahurot ni sila kay bati paminawon nga naay drug group nga nag-operate,” matod ni Figaredo.

Dugang niya nga Perales niangkon nga iyang uyab si Jeppe Rosal, usa ka priso sa MCJ nga giilang suspek sa pagpatay ni Poro Police Station Chief Jonas Tajanlangit.

Si Rosal, Arnel Mata, ug laing 17 anyos nga igsuon nga nangasikop sa kapulisan Liloan sa miagong tuig.

Si Perales, taga Dalaguete, nasikop sa giabangang balay sa Sitio Tambis, Barangay Umapad, Mandaue, alas 2:41 kaadlawon kagahapon. Nakuhaan og lima ka gramos nga shabu nga balor og P59,000.

Si Alinsug nalistang high-value target ug sakop sa Almadin drug group, diin ang lider nasikop na.

Si Figaredo niingon nga uban sa kapulisan sa lungsod sa Compostela ug PDEA 7, malampuson ang laing buy-bust sa beach resort sa Compostela sa alas 3:07 sa kaadlawon kagahapon ug nasikop si Damole, 38, ug sila si Avila ug menor de edad. Nasakmit gikananila ang 590 gramos sa shabu nga mobalor og P6,962,000.