Capitol employees dunay P10 mil bonus

Makadawat og tag P10,000 nga insentibo ang kapin 1,500 ka mga casual ug regular nga mga empleyado sa kagamhanan sa lalawigan sa Sugbo sa pagsaulog sa 448th founding anniversary sa Sugbo.

Apil niini ang mga elected nga opisyal.

Apan, gipugngan ang alang sa 133 ka mga empleyado ug jail guards sa Cebu Provincial Detention and Rehabilitation Center (CPDRC).

Sa iyang pakigpulong sa kasumaran sa pagkahimong lalawigan sa Sugbo kagahapon, si Gob. Hilario Davide III nimando sa mga provincial jail guards nga magtinarong sa ilang trabaho.

"Because wala ko malipay sa inyong gibuhat diha sa CPDRC. Pagtarong mo diha sa CPDRC. Heads will roll, I will assure you," pamulong sa gobernador.

Si Davide wa makauyon nga duna na usab nasakmit nga shabu ang awtoridad gikan sa tray sa itlog sa canteen sa CPDRC atol sa greyhound operation niadtong Agusto 1 nga nagbalor og P236,000 ug ubang kontrabando. Si Davide niingon ang mga regular ug casual nga nagtrabaho sa Kapitolyo sud sa upat ka buwan ug hangtod sa Agusto 6 ang makadawat sa P10,000.

Matod niya dili kini maisip nga anniversary bonus apan, insentibo isip pag-ila sa maayo nga performance nga gipakita sa mga empleyado sa Kapitolyo.

Kini ilabi na sa daghan nga mga pasidungog nga nadawat sa provincial government sama sa Seal of Good Local Governance sa Department of Interior and Local Government sa miaging tuig ug Kalamidad at Sakuna Labanan Sariling Galing ang Kaligtasan (Kalasag) Award gikan sa National Disaster Risk Reduction and Management Council (NDRRMC) karong tuiga.

"Tungod sa atong hiniusang paningkamot nakab-ot nato, we were recognize," pahayag sa gobernador.

Si Provincial Budget Officer Danilo Rodas niingon ang insentibo pinasubay sa Program on Awards and Incentives for Service Excellence (Praise) Program alang sa mga kawani sa gobiyerno base sa ilang performance.

Matod niya ipasukip nila sa P50milyones nga supplemental budget ang paghatag og insentibo nga iduso nila sa Provincial Board sa sunod semana.

Si Rodas nidugang kon maaprobahan ang supplemental budget madawat ang insentibo human sa usa ka semana.

Way labot ang mga job order employees sa insentibo apan kadaghanan nila nakadawat og 10 ka kilong mga bugas ug mga delata.