Branding committee gitukod sa lalawigan sa Sugbo

Unsay nindot nga branding sa lalawigan sa Sugbo?

Si Gobernador Hilario Davide III nagtukod og branding committee nga maoy maghuna-huna kon unsaon pag-promote sa probinsya nga malahi gikan sa ubang mga lalawigan ug siyudad sa Pilipinas.

“We have to come up with something that would really identify Cebu ba...easier for people to remember nga this particular makadungog sila, makakita sila aw Cebu ni,” pahayag sa gobernador.

Nakita ni Davide ang panginahanglan nga maghimo og branding sa lalawigan aron kini motatak sa hunahuna sa mga tawo sa higayon nga malitok ang pangan nga Cebu o Sugbo.

Pinaagi sa Executive Order No. 14, ang gobernador nagtukod sa komitiba nga langkuban sa mga opisyal sa Kapitolyo.

Si Provincial Administrator Mark Tolentino ang magsilbi nga chairman sa Branding Comittee samtang ang mga miyembro niini mao sila si Human Resource Management Officer Bonifer Nacorda, Provincial Tourism Officer Joselito Costas, Provincial General Services Officer Jone Siegfred Sepe, Katherine de la Calzada sa Internal Audit; Provincial Information Officer Jasonjes Monteclar, ug Roy Soledad sa Cebu Investment and Promotions Office.

Samtang ang kapikas sa gobernador nga si Jobella Davide ug Rodrigo Lachica, Jr. ang magsilbi nga mga consultant.

Ang mga katungdanan sa komitiba naglakip sa pagtukod og official brand sa lalawigan, paghimo og mga brand strategy, paghimo og branding standards ug mga palisiya, pag-monitor sa pagpatuman sa mga palisiya ug pagtuman sa ubang gimbuhaton sa kamandoan.

Nahuna-hunaan ni Davide ang paghimo sa komitiba sa dihang nakahigayon siya pagbisita sa ubang mga lugar sa Asya nga kini usab ang gihimo.

/ AMPER CAMPAñA ■ SaYaW: Si Gob. HIlarido Davide III ug iyang asawa nga si Jobel (tuo) maoy nangulo sa mga department head dihang mihalad silag sayaw atol sa kasulogan sa ika-448 nga anibersaryo sa lalawigan sa Sugbo.