Building sa lalawigan ipa-inventory
Gihangyo sa Provincial Board ang mga mayor sa kalungsuran ug dakbayan sa lalawigan sa Sugbo nga mopahigayon og inventory sa tanang mga edipisyo nga duha ka andana ug sobra ang gitas-on nga ubos sa ilang hurisdiksyon.
Nakita sa Sangguniang Panlalawigan sa Sugbo ang panginahanglanon nga masusi sa Office of the Building Officials o municipal engineers sa mga local government unit sa probinsya ang kalig-on sa mga building human sa nahitabo nga kusog nga linog sa Leyte niadtong Hulyo 6.
Duha ka tawo ang namatay sa nahugno nga mga edipisyo sa siyudad sa Ormoc ug lungsod sa Kananga ug nakaapekto usab sa supply sa kuryente.
Si Provincial Board Member Thadeo Jovito ‘Jonkie’ Ouano, chairman sa committee on environmental conservation and natural resources sa PB, namahayag nga gikinahanglan ang regular nga pagsusi sa kalig-on sa mga building, apil ang structural, electrical, mechanical, plumbing ug fire protection systems aron maseguro ang kaluwasan sa mga okupante niini.
Ang iyang resolusyon nga naghanyo sa higpit pag-inventory sa mga building gipalabang sa PB sa regular session niini niadtong Lunes.
Dugang sa bokal aron maseguro ang kalig-on sa mga edipisyo kinahanglan usab motuman kini sa building ug fire codes sa nasod.
Ang PB nanawagan usab sa mga LGU sa lalawigan nga pahugtan ang pagpatuman sa National Building Code of the Philippines.
Kini human tulo ka mga bata ang nangalumos niadtong Hulyo 22, 2017 nga nangaligo sa bangag nga dunay nagpundo nga tubig sulod sa usa ka construction site sa lungsod sa San Fernando.
Matod ni Ouano nga malikayan ang pagbuhis sa kinabuhi kon higpit nga gipatuman ang mga lagda kabahin sa konstruksyon.