REED 3-PEAT!
Nagpakita og maayong performance si Timothy James ‘Tim Reed sa Australia sa biseklita unya mikombati og sakto sa lumba sa dagan aron angkunon ang ikatulo niyang sunodsunod nga kadaugan sa men’s pro category sa 2017 Cobra Energy Drink Ironman 70.3 Philippines kagahapon sa Shangri-La Mactan Resort and Spa sa Lapu-Lapu City.
Ang 32 anyos nga triathlete mihuman sa tahas nga 1.9-kilometer swim, 90K bike ug 21K run sulod sa 3ulo ka mga oras, 54 ka mga minutos ug 0.7 segundos.
Si Xterra World champion Mexican Mauricio Mendez, 22, maoy miangkon sa ikaduhang luna pinaagi sa oras nga 3:56:46 samtang ang iyang kababayan ni Reed nga si Ryan Fisher naa sa ikatulo sa oras nga 4:00:20.
Naggukod si Reed human sa lumba sa langoy ug mihaw-as siya sa tubig nga naa sa ikatulo.
Nakuha niya ang liderato human sa bike event diin nahuman niya kini nga tahas nga nag-una siya og kapin sa lima ka mga minutos.
Giprotektahan ni Reed ang iyang bintaha sa lumba sa dagan hangtod sa hingpit niyang kadaugan.
“I knew I was very fit and I knew that I have a good chance but if somebody else maybe would have put in a good performance, I’m okay with that,
and today was just all about focusing on myself and racing as hard as I could,” asoy ni Reed sa interbyu sa Sun.Star Cebu, igsuong buhatan ning mantalaan.
Gipasabot ni Reed nga iyang gipaningkamutan nga makamugna og dakong bintaha sa bike event aron maseguro nga dili siya magukdan inig abot sa lumba sa dagan.
“Early on the bike I made my move, so we have a little gap to the rest of the field and I thought it is time to go, and that opened up a few minutes, I was able to do my math, and on to the run I was I realized that I could lose any fluid as it was too hot, so I run the first 10 kilometers a little bit conservative,” dugang ni Reed.
Gipasalig ni Reed nga mobalik siya sa sunod tuig aron depensaan na sab niya ang iyang titulo.
Sa women’s pro category, si Amelia Watkinson sa New Zealand maoy nipatigbabaw pinaagi sa oras nga 4:29:17.
Ang Australians nga sila si Jacquiline Thistleton ug Kerry Morris mao ang milingkod sa ikaduha ug ikatulong luna pinaagi sa oras nga 4:35:53 ug 4:39:11.
Si Watkinson midominar sa tanang events sa kompetisyon.,
“I had a bit of slow start to training this year and had a few setbacks. On the race, I waged to get little bit of the lead from the start and I just maintained it throughout the day,” matod sa 26 anyos nga triathlete. Ang lumba misubay sa kadalanan sa mga siyudad sa Lapulapu, Mandaue, Cebu ug Talisay.