Mga taga CPDRC way P10T

Hangtod dili makita ni Gobernador Hilario Davide III nga nagtinarong sa ilang katungdanan ang mga prison guard ug empleyado sa Cebu Provincial Detention and Rehabilitation Center, dili ihatag ang insentibo nga P10,000.

Ang gobernador nihatag og higayon nila hangtod sa Biyernes sa paghatag og pangan sa ilang mga nailhan nga nalambigit sa mga binoang sa CPDRC sama sa pagpalusot og gidili nga drugas ug ubang kontrabando.

“I told them you know any information that you give me will be treated with strictest confidentiality,” pamulong ni Davide. Kagahapon, gibisita ug gitigom sa gobernador ang mga empleyado ug gwardiya sa provincial jail.

Sa closed-door nga tigom, gipasabot ni Davide kon nganong gipugngan ang paghatag sa insentibo ngadto sa mga empleyado sa CPDRC diin 63 niini mga prison guard.

“So, ang akong tuyo diha to teach them a lesson ba nga they have to step up,” pamulong sa gobernador nga nahinabi sa mga tigbalita human sa ilang 30 minutos nga tigom.

Matod niya nitando ang mga gwardya sa ilang rason sa pagpugong sa insentibo.

Sa samang tigom, ang provincial guards nihangyo ni Davide nga pausbawan ang ilang sweldo ug ang gobernador nipasalig nga iya kini patun-an sa Human Resource Management Office. “We’ll be studying that kay dako man gud na ang temptasyon tungod sa kagamay sa sweldo tingali ang uban niini matintal ba kay naa may manuhol diri nga mga priso nga mga big time,” matod ni Davide. Ang mga prison guard nihangyo usab sa gobernador nga ipaayo ang ilang puy-anan sud sa prisohan.