Comelec dili maapektohan: Gujilde

Dili maapektuhan ang Commission on Elections sa pagpangandam sa umaabot nga barangay ug Sangguniang Kabataan (SK) elections sa kontrobersiya nga giatubang karon ni Comelec

chairman Andres Bautista.

Si Cebu Provincial Election Officer Atty. Ferdinand Gujilde niseguro nga dili mabalda ang ilang pagpangandam sa nagsingabot nga piniliay sa Oktubre 23 sa kontrobersiya nga giatubang sa ilang labaw.

Matod niya wala na sila makugang niini ug naanad na sila sa mga kontrobersiya sa Comelec.

“I think it's part of the hazards of our jobs. Anad na mi ana,” pahayag ni Gujilde.

Siya namahayag nga bisan kon si Bautista, chairman sa Comelec apan usa lang kini sa pito ka commissioners.

Sila masaligon nga mapanalipdan ni Bautista ang kaugalingon sa mga pasangil nga gipahid batok niini. Ang asawa sa Comelec chairman nga si Patricia Paz Bautista nipasangil sa iyang bana nga dunay kwestyonabli nga katigayonan nga giingong moabot og P1 bilyon base sa affidavit nga giduso niini ngadto sa National Bureau of Investigation.

Matod sa ginang wa giapil og deklarar sa iyang bana ang maong mga katigayonan sa Statement of Assets, Liabilities and Net Worth (SALN) sa miaging tuig.