Operasyon sa kapulisan batok sa pagpamusil pakyas apan suspek nga tigpayuhot og drugas nasikop

Inay suspek sa pagpamusil ang tumong sa operasyon sa kapulisan Talisay, apan mamaligyaay na hinuon og shabu ang ilang nasikop sa Barangay Dumlog kagahapon. Ang nasikop giila nga si Sanevir Villia, 27, ulitawo ug taga Sitio Cagang, Barangay Dumlog.

Si PO3 Jason Del Campo sa Talisay City Police Station niingon nga dunay kaso sa pagpamusil sa Lagtang.

Kini may kalabotan sa pagpamusil nila ni Janilo Ladera ug Jerry Labandero, kinsa naila nga sakop sa hitman nga napatay nga si Manuelito Sencil alyas Dong-Dong nga giingong konektado sa inilang druglord nga si Franz Sabalones.

Niadto ang kapulisan sa Barangay Dumlog tungod sa taho nga naa ang suspek lugar apan, ilang nabantayan nga dunay tulo ka mga lalaking kadudahan og lihok.

Matud ni PO3 Del Campo, nailhan sila nga pulis ug nagdinaganay ang pipila ka tawo.

Apan ilang nasignit si Vellia ug nakit-an nga nagdala kini og ilegal nga drugas.

Nakuha gikan sa suspek ang ug medium-sized nga pakite ug lima ka gagmayng pakite sa shabu nga mobalor og P35,400.