SA PAMANDAY NAHARUHAY
Dili babag ang kakuwang sa edukasyon sa pagkab-ot sa mga damgo sa kinabuhi.
Napamatud-an kini ni Edwin Mabini, 59, kinsa igo lang nakatapos sa elementarya apan iyang napahuman sa pagtungha ang upat sa unom ka mga anak sa kolehiyo pinaagi sa iyang pagka-karpentero.
Nilambo usab ang iyang kinabuhi tungod sa pagpaningkamot.
Si Mabini nihuman sa elementary niadtong 1971 sa barangay Sirao ug human niadto, nag-uban-uban na siya kang Luciano, iyang amahan sa pagpamanday.
Paglabay sa walo ka tuig, iyang naminyuan si Daisy Codino niadtong 1979 diin ang una nilang panginabuhian mao ang paghimo og lingkuranan nga gikan sa tukog para export.
Human niadto, dihang nihinay ang mga order tungod sa kompetisyon, naghimo na usab sila og basket para gihapon sa export nga ginama gikan sa sig-id o bagon.
Ilang kamaguwangan nga anak mao si Ritchel, 36; Allen, 34, kinsa igo lang nakalampos usab sa high school sanglit nitabang sa pagpanginabuhi sa ilang amahan.
Si Daisy nahimo usab nga mananahi.
Matod pa ni Mabini, nga iyang naagian ang unang mga pagsuway ug kalisdanan sa kinabuhi dihang nitungha na sa kolehiyo ang iyang ikatulong anak nga si Leslie niadtong 2002 sa Cebu Normal University (CNU).
“Maayo na gyud unta kaayong i-surrender kay kining magkautang-utang pa ta sa pagpa-eskwela pero tungod lagi sa interest nilang motungha gyud, mao nang padayon sa atong paningkamot,” asoy ni Edwin.
Dihang ni-graduate na si Leslie sa pagka-maestra, daw iyang nakab-ot ang langit sanglit bisan siya ug ang ilang mga kaliwat wa magdahom nga sa pagpamanday, siya makahimo og maestra. Si Leslie nagtudlo na karon sa public high school.
Apan di kadto katapusan sanglit nisunod na usab og eskwela si Wendel niadtong 2006 sa CNU ug karon usa na usab ka public school teacher.
Samtang nagtungha pa si Wendel sa kolehiyo sa 3rd year, ang iyang manghod nga si Ediza nitungtong na usab sa kolehiyo. Kini nagpa-enroll sa Southwestern University (SWU)
“Nakita nako ang ilang paningkamot sa pag-eskwela bisan apiki sa ilang mga allowance mao nang ako naningkamot lang gyud ko uban sa pag-ampo sa Ginuo,” padayag ni Edwin.
Si Ediza ni-graduate niadtong 2012 ug nahimong magtutudlo sa SWU sa high school department, freelance disc jockey ug magtutudlo usab sa mga langyaw nga Hapon, kinsa gustong makat-on og English language.
Matod niya nga nigaan-gaan na ang iyang gipas-an nga obligasyon dihang nakatrabaho na si Leslie ug Wendel sanglit nitabang na kini sa gastohan sa balay,
Nilampos usab sa pagtungha ang iyang kamanghoran nga si Shielo sa Asian College of Technology (ACT).
Dihang nigraduate na ang iyang mga anak, napahuman na ni Mabini ang iyang duha ka andana nga balay sa barangay Paril nga gitrabaho sulod sa 12 ka tuig sanglit kaniadto ang iyang prayoridad mao ang pagpa-eskwela sa iyang mga anak.
“Nalipay ta kay wala ta magtuo nga atong makab-ot ang mga pangandoy uban sa panalangin sa Ginuo gumikan usab sa walay hunong nga pag-ampo,”butyag niya.
Sa pagpanglabay sa panahon, nilambo ang iyang pagpamanday ug modawat na siya og sub-contract sa mga contractor.
Nakapalit na siya og kaugalingong dumptruct ug pickup vehicle nga maoy iyang sakyan uban sa iyang mga tawo matag adlaw.
Gidasig niya ang mga tawo nga sama kaniya nga mubo ra og nakab-ot sa natad sa edukasyon nga di magpakawala sa paglaom sa ilang panginabuhi inubanan sa pangaliya sa Ginuo kay kini ihatag ra. /