Mirisi sa taga CPDRC
Naglaway lang ang 113 ka mga jail guards ug ubang mga empleyado sa Cebu Provincial Detention and Rehabilitation Center (CPDRC) sa P10 mil nga gihatag ni Gov. Junjun Davide sa mga empleyado sa Capitolyo isip founding anniversasy incentives. Ang tanang empleyado sa Capitol, regular man o casual, makadawat. Pero ang taga CPDRC walay labot.
Matod pa sa gobernador nga siya ug si Vice Gov. Agnes Magpale nagkasabot nga dili apilon ang mga kawani sa CPDRC gumikan sa ilang "unsatisfactory performance." Wala maka-uyon ang gobernador gumikan sa mga kontrobersiyal nga nahitabo karon sa provincial jail.
Karong bag-o, nagpahigayon na usab ug Greyhound operation ang kapulisan sa maong jail facility gumikan sa hangyo sa gobernador, ug nasuta gihapon nga naghitak ang illegal nga drugas ug uban kontrabando.
Nganong nakalusot ug nakasulod man gihapon ang illegal nga drugas ug kontrabando kon nagtamod og nagtinarong nga nagtrabaho ang mga empleyado diha labi pa ang mga jail guards?
Istrikto kaayo sila sa mga mobisita o dalaw diha. Ug nasayod na sila sa modus sa mga mobisita kon asa itago ang mga illegal drugs. Apil ang mga babaye nga dalaw bukiki-on nila tanan.
Apan nganong aduna man gihapoy nakalusot? Aw, gumikan kay konsabo man diay ang sa mga empleyado. Ang nga kawani ra diay ang magpalusot. Diha kadtoy job order employee nga nadakpan.
Tiaw ba nimo kanang ang shabu anha ra paliton sa canteen sulod sa jail nga gidumala sa mga piniriso.
Mao nga ipahunong na sa gobernador ang operasyon sa canteen. Ambot unsa-on kaha na pagputol ang mga binoang sa mga jails labi pa kining pagpalusot og illegal nga drugas.
Mao nang maka-ingon ko nga mirisi nga dili makadawat og incentives ang mga kawani sa provincial jail.
Pero moingon ra pod na sila nga "okey ra Gob nga dili mi nimo hatagan, total dako man sab mi og kita diri pinaagi sa drug trafficking."