Higayon sa pagtubag sa akusasyon
Atubang. Luoy si kanhi Cebu City mayor Mike Rama kay hangtod karon gidudahan gihapon nga drug
protector bisan og wa na sa panggamhanan kay wa pa man siya mapasakae og sumbong kon unsa man galing ang iyang salaod.
Susama ra pud ang sitwasyon ni Daabantayan Mayor Vicente Loot bisan og miingon na siya nga gi- clear na siya sa CIDG apan matag hisgot ni Presidente Duterte sa ilegal nga drugas malakbitan gihapon ang iyang ngalan.
Maayo na lang si negosyate Peter G. Lim kay gipasakaan na og sumbong sa Department of Justice (DOJ) ug iya na gyud maharong ang mga tawo nga namasangil niya. Sa Agosto 14 ang adlaw sa iyang pag-atubang sa piskaliya.
Gani, daghan ang nagpagawas og malisyuso nga estorya nga mikagiw na si Lim sa Cebu. Apan sa miaging semana iyang namapatud-an nga bakakon sila kay nagpa- interview man siya sa media. Iyang gipanghimakak ang akusasyon.
Ang pulis nagpakita pud og gilas. Bisan og nadawat na sa tawo ni Lim ang subpoena nga ilang gihatud gikan sa DOJ alang sa Agosto 14 nga preliminary investigaton mibalik pa gyud kay ang ilang gusto si Lim ang modawat sa subpoena. Susmaryosep!
Bag-o na diay ang proseso ron sa pagserbe og subpoena? Pero sa mga ordinaryo nga kaso ug ang sinumbong nga ultimo hapit dili moabot ang subpoena sa nahingtungdan. Sige na lang, ingon ana gyud ang panahon dunay kausaban usahay.
Basi sa atong Batakang Balaod ug proseso, si Lim di man moproyba nga siya inosente tungod kay ang moproyba nga siya dunay kalabutan sa giingon nga negosyo sa ilegal nga drogas ang atong kapulisan nga maoy nagpasaka sa sumbong.
Si miaging tuig si Peter G. Lim miadto sa NBI aron paglimpyo sa iyang ngan. Gani, si DOJ Sec. Vitaliano Aguirre II mismo miingon nga ang Peter Lim nga taga Cebu City nga negosyante dili mao nga Peter Lim nga gituhoan nga supplier sa ilegal nga drogas.
Kon unsay tinuod ani nga estorya, mahibaw-an unya nato human sa preliminary investigation ug duna bay kaso nga ipasaka sa DOJ batok ni Peter G. Lim.
Pero, bisan pa sa sumbong nga giatubang na karon ni Lim, sama ni kanhi Mayor Rama ug Mayor Loot, nahadlok sila sa ilang kahilwasan. Matud pa ni Lim, basin og dunay mga tawo nga mopahimus sa sitwasyon.