Noven nagkayamukat ang diction sa `Wish’
Brayt sad ang nakahunahuna aning gipauso karon sa Wish FM 107.5, diin mangimbitar sila og mga singer nga mokanta live sulod sa ilang booth base sa request or wish sa ilang mga listener. Sikat kaayo ni karon sa YouTube ug Facebook. Ang ilang studio naa sulod sa mini bus kay makita sa fiber glass nga nagdagan pa ang ilang gisakyan ug gani, duna sila’y makadungan nga mga dyip de pasahero sa dalan nga mohangad ug motan-aw sa ilang studio. Klaro nga mahalon ang ilang microphone nga gigamit ug gidisenyo gyud ang booth nga pang- acoustic. Tingali daghan na ang nakakita ninyo aning Wish 107.5 sa YouTube.
Pipila sa mga paborito nakong nakit-an nga nikanta mao silang Nina, Pauleen Agupitan, Sam Mangubat, Sue Ramirez ug Gary Valenciano, nga bisan naglingkod plakado lang gihapon mokanta.
Dinhi nimo makita kon kinsa gyuy mga banggiitan. Hasta ang mga diksyon klaro kaayo labi na’g masayup, sama sa Tawag ng Tanghalan first grand champion Noven Belleza nga nabuking kon unsa kadako pa sa iyang dapat trabahuon sa iyang diction.
Nikanta si Noven sa Wish 107.5 og Air Supply, ang pagpronounce niya sa “ease the pain,” kay “ace the pain.” Daghan kaayo siya’g sayop.
Suwerte lang nga siyay nidaug sa Tawag ng Tanghalan. Ug nganong wa ampingi ang gihatag untang higayon niya. Sayang…
NOVEN VS. BRYAN
Ambot pamilyar ba mo ni Bryan Magsayo nga nag- viral sad sa YouTube niadto. Maayo kaayo mokanta og Air Supply ug Firehouse.
Duna’y nikumparar nilang duha ni Noven Belleza kay pareho man silag tirada Air Supply, pareho sad silang tenor ug tagming og tingog. Pero tataw nga mas limpyo mokanta si Bryan.
Kon wa pa mo kita, suwayi og tan-aw sa Youtube aron inyong masuta ang diperensya. Just type: “Bryan Magsayo & Noven Belleza covers Here I Am (Air Supply).”
WALAY BANGA…
Sa laktod nga pagkasulti, dili garantiya nga kay nidaug man ka sa Tawag ng Tanghalan, maayo na ka mokanta. Wa na magpasabot kay na-“gong” man ka, banga na ka.
Ang matuod nga kadaugan, dili na makita sa usa lang ka contest. Ang tinuod nga kumpetisyon naa sa gawas, kon giunsa nimo pagbangon gikan sa kapakyasan, ug mahimong lig-on sa sunod nimong tikang sa laing ang-ang sa entablado sa imong kinabuhi.