I just walk away
Hapit nagbuntag kong way tulog. Makatulog ba gud ko sa maong sitwasyon? Wa gyud ko magdahom nga maingon ani ang among relationship ni Noel. Dako kaayo kog pagsalig niya, uy! Bisan gamay, wa gyud sa akong hunahuna nga luiban ko niya.
Apan nahitabo gyud kini karon. Ug ang akong bestfriend pa gyud ang iyang gipamabdosan?
Pagka buntag, bisag kapoy ang akong lawas ug guol kaayo ko, misulod ko sa akong klase. Tuyo ko nga magkaestorya mi sa personal si Noel. Giteksan ko siya nga magkita mi sa school canteen during our vacant period. Parehas mig vacant period, nine in the morning.
Hapit mi magkadungan pagsulod si Noel sa canteen. Isig order mi sa among snacks sa counter. Nagsige kog pasiplat kang Noel samtang nagsugod na mig kaon sa giorder namong hopia. Apan nagtimi-timi lang ko, wa koy ganang mokaon. Bisag sa softdrinks, panagsa ra kong moinom ani.
“May problema ka ba, Helen? Wa man gud kay tingug-tingog diha.” Nagpahyom si Noel, ug as
usual kon ingon mi aning kahimtanga ron, mokupot dayon siya sa akong kamot nga ipatong ko sa ibabaw sa lamesa. Hinay kong gikuha ang akong kamot nga iyang gikuptan. Nadiyong ang iyang mga mata nga mitan-aw og dugay nako. “Why?” Nahibulong gyud tingali si Noel sa gipakita kong lihok niya karon. Apan, kinsa man say malipay sa iyang gibuhat?
“Nganong nagpasalig-salig ka man nako, Noel, nga ako ra ang girl nga imong higugmaon? Pero kutob ra man diay ni sa tumoy sa imong dila.”
“Ngano gud nga miingon ka man ana, Helen? Please pasabta gani ko.”
Gitutokan kog dugay si Noel. Gisuta ko kon nagpakaaron-ingnon ba lang siya nga kunohay wa siya makasabot sa buot kong ipasabot. Apan morag tinud-anay ang iyang reaksiyon nga nakita ko niya. Morag di siya gustong mamakak nako.
“Tinuod nga ikaw ra ang babaye nga akong love, Helen. Wa nay lain, uy!”
“Nagkaestorya mi si Nikki. Mituyo gyud siya sa pag-adto sa among ba’ay kagahapon sa hapon, Naghilak siyang misugilon nako nga mabdos siya. Ug ikaw ang amahan sa bata?” “Shit! Gitinuod gyud diay niya ang iyang gibahad nako? Sa tan-aw ko kang Noel, nasuko gyud siya pag-ayo.