Nagbuwag na
Dear Noy Kulas,
Maayong adlaw kanimo. Hinaot nga malipayon ug naa ka sa maayong panglawas karon.
Salamat kaayo sa makinaadmanong mga tambag. Akong gituman ang imong sugyot apan ning bag-uhay lang nipahibawo si Annie nako nga gibuwagan daw siya sa iyang hinigugma tungud ra kuno sa gamay kaaung hinungdan. Di na lang ko mag pa hipokrito, nalipay ko apan naluoy sa laing bahin kay nasakitan pod baya siya. Ako siyang gisultian nga i-fix ninyo ug paghusay mo, apan di na kuno makig estorya ang iyang uyab karon.
Karon, Noy, angay ba na- kong tuohan si Annie ug ipadayon nako ang akong pag pangulitawo niya? Unsa kaha sa tan-aw mo, Noy, ang saktong, tawgun tag “grace period” before ko mohimog lakang sa pagbalik og pangolitawo ni Annie? Tinuod, Noy, sa pagka karon excited kong makig date og balik ni Annie, apan huwaton nako ang imong mga tambag.
Daghang salamat, Noy. MR. J Mr. J,
Wa na siyay uyab ug nagkasuod na man sab mo. Nakasulti kana sab sa imong pagbati niya. Panguyabi og balik kay di man bag-o ang imong pagsulti niya sa imong gibati. I follow-up kay basin ning higayuna sugton na ka. Naa may giingon nga strike while the iron is hot. Ayaw na paghuwat anang grabe period kay sa pagpanguyab, wa na. Naa ra niya kon sugton ka niya o di.
Immaterial usab kon tinuod ba nga nagbuwag na sila o wa. Basta kay nisulti na siya nga wa na silay relasyon. Makapahibung lang kon nganong ang lalake maoy nakigbuwag ug di na makigbalik niya. Sa ato pa, si Annie ang gibiyaan ug siya ang nigukod. Ngano man kaha? Mao nay angay mong bantayan kon pananglitan magkauyab mo.
Ilha usab siya og maayo kon magkauyab na mo. Pareho sa usa ka kaso nga akong nasugatan nga ang lalake hapit masugamak sa babaye nga mabdos diay niadtong higayuna unya ang nakapamabdos wa na manubag. Maayo gani kay iyang nahibaw-an daan ang sitwasyon tungod sa lain niyang higala.
Ang akoa warning lang ni. Mas maayong magbantay. Apan wa magpasabot nga sama sila og sitwasyon, apan angay kang magmatngon. Kon magkauyab, ilha siyag maayo. Kana maoy timan-i kanunay. NOY KULAS