Haranista sa tungang gabii
Nianang gabhiona wala pa gyud batia og pagduka si Nardo. Mao nga nakahunahuna siya nga mamisita kang Wanita, iyang hinigugma. Tulo na ka buwan ang ilang relasyon.
Ang balay nilang Wanita tua mahimutang sa ibabaw nga bahin sa pangpang nga ginganlag Baryo Sirak. Daghan ug dagko kaayo ang mga kahoy nga naglibot sa balay nilang Wanita. Kursunada kaayo si Nardo nga mamisita kay takdol ang buwan ning gabhiona. Gidala niya ang iyang sista ug librito sa songhits. Sa iyang bahin, nadani pag-ayo si Wanita kang Nardo tungod sa kamaayo niini mogitik sa sista, labi na sa abilidad niini sa picking. Ug maayo usab kini mokanta.
Nahinumdom karon si Nardo sa gisulti sa iyang suod nga higala, si Archie, nga duna kunoy mangharana sa ilang Wanita bisag tunga nang ganabati bii. Matod pa sa nakakita, wa kunoy mga ulo. Ginaingon nga sila mga haranista ni Wanita kaniadto nga gibalbal sa usa ka mangtas nga ungo. Apan gugma ang naghari sa galamhan ni Nardo karon ug dili niya igsapayan bisag magkahulogan kini sa iyang kamatayon. Dili gyud siya mosibog. Padayon siya nga namisita kang Wanita.
Human sa taudtaod nga pagkabildohay, may gisugyot si Wanita.
“Nardo, alas dose na sa gabii. Pauli na. Layo pa ra ba dinhi ang inyong pinuy-anan,” matod ni Wanita nga nag-alindasay. “Wa ka mahadlok ning dapita? Lagyo kaayo ang mga silingan. Daghan pa gyud ang kakahuyan!”
“May gipaabot lang ko nga moabot karon. Ang mga haranista sa inyong balay. Gusto kong ikahimamat sila,” ni Nardo nga mitan-aw sa iyang relo de pulso.
Miuwang ang usa ka iro ug kini ni Nardo. Nanlimbawot ang iyang balhibo. Gikulbaan siya. Unya mihuros ang bugnaw kaayong hangin.
“Nardo,” matod ni Wanita, “pauli na, basin og unsa pay mahitabo kanimo!” Apan wa mokihol si Nardo. “Nardo, dili ko gusto nga ang nahitabo kanila mao usab ang mahitabo kanimo, tungod kay...” matod ni Wanita.
“Tungod kay... unsa, Wanita? Unsay buot mong ipasabot?” sakgaw ni Nardo.
“Dili pa karon ang tukmang panahon nga masayod ka, Nardo,” ni Wanita. “Sige na, lakaw na.”
Mobiya na unta si Nardo dihang may nabati siyang nangharana sa gawas. Midungaw siya sa bentana. Mga haranista nga way mga ulo. Unya kalit lang nga nahanaw si Wanita. Ug may nabati siya nga may mikapakapa sa luyo sa balay nilang Wanita, daw mga pako sa dakong langgam. Dali siyang mibiya sa balay nilang Wanita.
Taudtaod may nabati siyang tingog nga nagsangpit sa iyang ngalan. Nakita niya sila si Archie, Empyong ug Puldo. Nagpadulong sila sa balay ni Wanita. May dala silang mga bagakay nga tinalinsan ug mga sulo nga gikulukod nga mga langkay nga dahon sa lubi.
“Bay Nardo, pastilan, maayo kay dia ka man diay! Maayo na lang kay way dautang nahitabo nimo,” matod ni Archie nga gibati og kabalaka sa iyang higala.
“Wa man, Bay Archie. Gipapauli man ko ni Wanita,” ni Nardo. “Apan, Bay, nakita ko ang mga haranistang way ulo.”
“Aron ka masayod, Bay Nardo. Giapas ka namo dinhi kay nisulti ganiha si Ingko Tomas nga si Wanita mao ang mangtas nga ungo nga nagbalbal sa mga haranistang way ulo,” ni Archie. “Anananggal siya!”
Nahinumdom si Nardo sa kalit nga pagkahanaw ni Wanita kaganina ug sa nabati niyang pagkapakapa sa mga dagkong pako sa luyo sa balay ni Wanita.
Unya hinayhinay nga nawala ang mga tingog sa harana sa tungang gabii ug mibanos ang pagkutingkuting ni Nardo sa iyang sista samtang nagsunod siya nilang Archie, Empyong ug Puldo pauli sa ila. (KATAPUSAN)