Star players sa China, NZ, Australia di sab makaduwa
Dili ikalimod nga lisod alang sa Gilas Pilipinas ang pagtapak sa haw-ang nga nabiyaan sa ilang mga higante nga sila si JuneMar Fajardo ug naturalized Andray Blatche sa ilang kampanya sa 2017 Fiba Asia Cup nga opisyal nga sugdan karong adlawa sa Beirut, Lebanon.
Hinuon adunay konsuwelo ang Gilas, wala sila nag-inusara nga nakasinati niini.
Ang ubang mga lig-ong puwersa sa rehiyon nawad-an sab og mga haligi sa ilawom lakip na niini ang labing gikahadlukan nga mao ang Australia, New Zealand ug defending champion China.
Wala na sa China sila si seven-footer Yi Jianlian ug rising star Zhou Qi, second-round pick sa miaging rookie draft sa National Basketball Association (NBA) ubos sa kampo sa Houston Rockets.
Apan bisan pa niini, ang line-up sa China mao gihapon ang tag-as sa kompetisyon.
Ang 7’2” nga higante sa Iran nga si Hamed Haddadi moduwa gihapon apan wala kini sa saktong kondisyon kay wala kini nakaapil sa preparasyon gumikan kay naangol kini.
Dili sab makaduwa sa ChineseTaipei ang ilang naturalized player nga si Quincy Davis gumikan kay aduna kini angol sa likod.
Ang Australia mokombati nga wala si Andrew Bugot, kinsa nagduwa sa National Basketball Association (NBA).
Dili sab makaduwa ang sakop sa Oklahoma City Thunder nga si Steven Adams alang sa New Zealand.
Ang Gilas mosugod sa ilang kampanya ugma batok sa China sa Group B nga kombati sa elimination round.