Montoya hari sa 2nd Catalyst Youth chess

Naangkon ni Edsel Montoya ang korona sa 2nd Catalyst Youth Leadership Institute Open Chess Challenge for a Better Future 2017 niadtong Dominggo sa 2nd Level sa Robinsons Galleria Cebu.

Gihuman ni Montoya ang 8-Round Swiss System nga torneyo dala ang 7.5 puntos.

Si Chris Aldritz Pondoyo naggunit sab og 7.5 puntos apan nalupig siya ni Montoya sa tie breaker system.

Isip kampiyon, nadaog ni Montoya ang P7,000 nga ganti ug tropeyo samtang si Pondoyo nakabulsa og P6,000.

Nahiluna sa ikatulong dapit mao ang Sugbuanong magduduwa sa Far Eastern University (FEU) nga si Rhenzi Kyle Sevillano.

Si Sevillano natanggong sa three-way tie sa 6.5 puntos kauban sila si Joseph Alfer Fernandez ug Erwin Ababat. Sa pagbuak ning maong panagtabla, nag-una si Sevillano, ikaduha si Fernandez ug katapusan si Ababat.

Midaog sa top kiddies ug top Ernestian (Marie Ernestine School) awards mao si Jerish John Velarde, si Jave Peteros sa top Carolinan title, si Jethro Esplanada sa top Josenian, si Duane Borgonia sa top UCnian samtang si Andrei Avenido sa top Atenean title.

Ang top female performer mao si Laila Nadera.