SERVANIA BATOK VALDEZ, SEPT. 22
Ex-Ala Boy mosuway og langkat sa WBO featherweight
Sa labing unang higayon, manuktok si Filipino boxer Genesis Servania alang sa world title batok kang WBO featherweight champion Mexican Oscar Valdez karong Septiyembre 22 sa Tuczon, Arizona.
Sa interbyu sa Rappler.com, gikompirmar sa trainer ni Servania nga si Mark Gil Melligen nga napirmahan na ang kontrata alang ning awaya.
Si Servania, kinsa adunay 29-0, 12KOs nga rekord, nagbasi na karon sa Kashimi Gym sa Kanazawa, Japan sukad sa iyang pagbiya sa bantugang ALA gym sa Sugbo niadtong 2014.
Mao pa man tuod kini ang labing unang world title fight ni Servania apan hinog na kini sa kasinatian aron mohamag sa usa ka dakong away.
Ang 25 anyos nga si Servania nakaposte og 12th round
knockout nga kadaugan batok sa kanhi world champion nga si Alexander Munoz ug midaog na sab kini batok sa title
contenders nga sila si Genaro Garcia, Angky Angkotta ug Rafael Concepcion.
Apan batok kang Valdez, kinsa adunay 22-0, 19KOs nga rekord, kinahanglang mas maayong away ang ipakita ni Servania.
Si Valdez, 26, modepensa sa iyang korona sa ikatulong higayon batok kang Servania.
Isip amateur, si Valdez adunay maayong rekord ug nakaaway kini sa Olympics niadtong 2008 ug 2012 kumpara kang Servania, kinsa wala’y kasinatian sa amateur ug mideretso kini’g away sa professional rank niadtong 2009.
Dili ikalimod nga grabe ka inilog si Chavez ning awaya apan alang kang Melligen, adunay dakong poruhan si Servania. Gihulagway ni Melligen si Servania nga mas hingkod na og inawayan.