■ GISUGDAN NA.
Mga heavy equipment gipahimutang sa may N. Bacalso Avenue sa Mambaling, dakbayan sa Sugbo sugod kagahapon aron sugdan na ang pagtrabaho sa underpass sa mao nga dapit. Ang pagbutang sa mga ekipo ug pagsirado sa usa ka lane nakamugna og grabeng kahuot sa trapiko.
Dili tiaw ang kahuot sa mga sakyanan sa N. Bacalso avenue, labina sa Barangay Mambaling, atol sa unang adlaw sa pagsugod pagtrabaho sa P689 milyones nga underpass.
Nasinati ang unang paghuot sa dagan sa mga sakyanan kagahapon sa buntag atol sa peak hour ug nausban nianang pagkahapon dihang padong na mamauli ang mga tinun-an ug mga trabahante paingon sa habagatan sa siyudad.
Si Konsehal Dave Tumulak, chairman sa public order and safety, maoy gisangonan ni Mayor Tomas Osmeña sa pagpakigtambayayong sa Department of Public Works and Highways ug ngadto sa contractor aron masiguro nga di makahatag og grabeng problema ang kaugmaran sa underpass nga proyekto ni Kongresista Rodrigo Abellanosa.
Gumikan niini, nahunahunaan ni Tumulak ug operations head sa City Traffic Operations Management (Citom) nga si Francisco “Isko” Ouano nga ipatuman ang one- way sa pikas bahin sa karsada sanglit gisirad-ang pikas habig diin nagsugod ang first phase.
Ang Citom nigamit og usa ka lane sa three-lane road paingon sa south aron magamit sa mga sakyanan gikan sa Pardo paingon sa South Bus Terminal (SBT).
Gipadayag ni Ouano nga kon grabe ang bul-og sakyanan panahon sa peak hours, ilang ipatuman ang one way system diin parahon sa mga Citom personnel ang paingon sa south hangtod nga makaagi ang tanang naghuot nga sakyanan gikan sa Pardo ug vice versa aron di magpaugatay sa tunga sa karsada.
Nigamit usab sila og manual traffic system sa intersection sa N Bacalso ug F. Llamas.
TRUCK BAN
Posibleng ipatuman karon o ugmang adlawa sa Citom ang pag-ban sa mga sakyanan nga paagion sa N.Bacalso avenue.
Ang oras kanus-a did-an sa pag-agi ang mga delivery van, truck ug kadtong mga sakyanan nga 6-wheeler pataas magsugod alas 7 ngadto sa alas 10 sa buntag ug alas 5 sa hapon hangtod alas 8 sa gabii.
Ang mga armored car ug garbage truck nga exempted sa dugang prohibisyon sa truck ban sanglit kwarta ug basura ang ilang gidala nga di pwede malangay.
Matod pa ni Ouano nga hangtod niining pagsuwat, padayon pa nga gihan-ay sa planning division sa Citom ang ilang mga lakang aron maminosminosan ang epekto sa trapiko mugna sa underpass. /