Way mikatap nga sakit sa iro sa Liloan: opisyal

Giklaro sa mga opisyal sa lungsod sa Liloan nga way outbreak sa canine distemper virus kun sakit nga makamatay sa mga iro.

Matod ni Municipal Agriculturist Ireneo Noval base sa gihimo nga validation sa mga Barangay Animal Health Aides (Baha) nga nadestino sa 14 ka mga barangay sa lungsod, pipila lang ka mga report sa simtomas sa virus ang natala sa Barangay Yati.

Sa post sa opisyal nga Facebook page sa kagamhanan sa Liloan, si Noval namahayag nga wala pa makompirmar pinaagi sa laboratory examination nga canine distemper virus ang kasakit sa mga iro.

Siya nidugang ang provincial veterinarian nga sangkap sa kahimanan sa paghimo og findings, wa modeklarar nga dunay outbreak sa maong kagaw.

Ang canine distemper makatakod nga kagaw sa mga iro, wolf, fox, raccoons ug ubang nga mga mananap.

Ang virus mokatap pinaagi sa hangin ug direkta o dili direkta nga contact sa apektadong mananap.

Si Noval niklaro ang virus dili makatakod sa mga tawo ug niawhag sa mga nagbuhi og mananap nga pabakunahan ang ilang mga binuhi.

Si Liloan Mayor Christina Garcia-Frasco nitug-an sa Superbalita Cebu nga gitun-an sa ilang mga abogado ang mga legal nga pamaagi batok sa magpatakap og sayop nga kasayoran sa social media nga makamugna og kaguliyang ug kahadlok sa publiko labi na sa mga nagbuhi og mga mananap. / SCG