600 ka mga bata sa Talisay nabakunahan na og anti-dengue

Kapin sa 600 ka mga bata sa Talisay City ang nakapahimulos sa unang hugna sa anti- dengue vaccine.

Kagahapon, sa Barangay Poblacion, ang mga ginikanan bitbit ang ilang mga anak nagedad 9-14 anyos hangtod ang gihatagan og vaccine.

Si Dr. Rey Ceasar Bautista, kinsa nangu sa kalihukan, niingon nga maayo nga mabukanahan ang kabataan aron malikay sa dengue agi sa pinaakan sa lamok.

Gitataw usab ni Bautista nga bisan pa man nabakunahan dili gihapon kini kasiguroan nga dili na masakit og dengue.

Hinungdan nga angayan gihapong manglimpyo sa palibot ug likayan ang mga tubig nga magpundo nga maoy itloganan sa mga lamok nga nagdalag sakit nga dengue.

Ang target nga mabakunahan 675 ka mga bata apan wala usab kini makaabot tungod kay sa dili pa mabukanahan ila mang siguruon nga himsog ang bata ug walay gihilantan, giubo o gisip-on.

Human usab mabakunahi na ang bata dili usab dayon papaulion tungod kay ila pang giobserbahan sanglit una pa kining higayon nga gilusad ang pagpamakuna. Matod ni Mildred Cabusas,

midwife sa Poblacion, base sa ilang record moabot sa 16 ka kaso sa dengue gikan sa Enero hangtod karong Agosto sa ilang barangay apan wala usay namatay.

Ang mga ginikanan nga nahinabi sa mga tigbalita nagpasalamat sa libreng bakuna tungod kay sila nabalaka sa ilang mga bata nga mataptan sa makamatay nga sakit.

Ang bakuna himuon makatulo ka higayon matag unom ka buwan gikan sa unang pagbakuna.

Sa Central Visayas, ang Sugbo ra nga maoy labing taas og mga kaso sa dengue fever ang gihatagan og pahat sa mga bakuna.

Ang Cebu City maoy labing daghan og kaso sa tibuok Sugbo.