Kapitolyo nangita og mga jail officer ikapuli

Nagsugod na sa pagpangita ang Kapitolyo og dugang jail officers alang sa Cebu Provincial Detention and Rehabilitation Center.

Kini aron maoy mopuli sa mga badlungon nga jail officers nga ipaubos unya sa suspensiyon kon sugdan na ang imbestigasyon, subay sa giingong pagpalusot og mga kontrabando.

Si Provincial Human Resource officer, Bonifer Nacorda, nimando na sa recruitment section sa iyang opisina pagpadayon sa sourcing o hiring sa mga kwalipikadong indibidwal nga mamahimong jail officer sa CPDRC.

Bisan kon job-order ug dili regular ang posisyon, apan gitug-an ni Nacorda nga lakip sa kwalipikasyon alang niini ang pagka-gradwado ug pagka-lisensiyado sa Crimonology.

Duna kini higayon nga ma- promote kon mabuksan na ang mga regular prison guard positions.

Dugang sa HR, sila nakigsa Cebu Provincial Police Office alang unya sa posibleng pagdugang og manpower alang sa prisohan.

Una nang gitigom ni Davide ang mga kawani sa CPDRC ug gihatagan ug ultimatum hangtud Biyernes pagtaho ngadto kaniya sa ilang mga kauban nga maoy responsible pagpakigkunsabo sa mga piniriso aron mapasulod ang mga kontrabando, sama sa drugas.

Karong adlawa, wa pa’y jail guard nga niadto sa opisina sa gobernador apan gipaniguro niini nga confidential ug dili mapublikar ang pagkatawo sa jail officer nga mohatag ug impormasyon kaniya.

Mas gusto ni Davide nga personal usab nga moadto sa iyang buhatan ang mga buot mohatag ug kasayuran, inay nga ipaagi kini sa text o kaha anonymous letter.