Paghaw-as sa kawad-on

Gitiman-an na ni Pamuno Duterte ang balaudnon nga makahaw-as sa katawhan sa kawad-on. Ang balaod gitawag og Universal Access to Quality Tertiary Education Act of 2017

Di matukib ang kalipay karon sa kabos nga mga ginikanan kay may dako nang kahigayunan nga makapatungha sa ilang mga anak sa kolehiyo sa mga State Universities and Colleges (SUC) sa nasod.

Usa kini ka kalampusan sa administrasiyon pagpagaan sa gibug-aton sa suliran sa kakabos nga gipas-an sa nasod. Kay ang edukasiyon mao may kahimanan nga mahaw-as ang tawo sa kawad-on.

Nagbansiwag ang kamatuoran nga ang dunay igong edukasiyon wa maglisod sa panginabuhi. Tagsa ra sa mga professional karon nga wa mo-uswag sa pagbayaw sa kalidad sa ilang kahimtang.

Lisod hinuon ang pagmilyunaryo, apan ang pagpuyo nga haruhay kaya sa nakahumag kolehiyo nga kargado adunay mga maayong trabaho. Aduna hinuoy gisuwerte nga nadato bisan kuwag grado.

Ginaingon nga ang kalambuan sa nasod nag-agad sa duha ka puwersa: kagamhanan ug katawhan. Ang kagamhanan mopabarog sa tigbayon ( framework) sa kauswagan ug ang katawhan sa sud sama sa busaog, bungbong, sawog ug atop.

Salamin ang katawhan sa nasod. Kon mauswagon ang katawhan malambuon sad ang nasod. Kon way ayo ang katawhan, magkuroy ang nasod sa pagbarog. Tinuod, it takes two to tango.

Giingon nga P100 M ang gastuon ning bahina ug unya na sa 2018 mo- take effect ang free college tuition kay wa sa nasudnong badyet karon. Dako kaayo nga gasto tuod apan maayo ang tumong kay sa kurakuton lang ang pundo sa mga kukhan sa kagamhanan.

Panghinaot nga di lisdon ang entrance o qualifying examination sa mga SUC aron daghan ang makatungha sa kolehiyo nga libre sa tuition fees. Tabang man kaha ning ato sa mga kabos tang kaigsuonan.

Maayo unta kon dunay mga libreng tulonghaan sa mga tinun-an nga ang kapasidad sa utok igo ra tawon makainom og tubig. Aw, hinuon duna man tay Technical Vocational Institutions sa kagamhanan. Libre sila gihapon kon ugaling.