Dokumento batok Bautista
Sentro karon sa kontrobersiya kining pagbulgar sa asawa ni Commission on Elections (Comelec) Chairman Andres Bautista kalabot sa iyang tinago-ang bahandi o kabtangan nga wa ideklarar sa iyang Statement of Assets, Liabilities and Net Worth (SALN). Si Patricia Bautista, asawa sa hepe sa Comelec, way lipod-lipod nga miyagyag sa tanan niyang nadiskobrehan nga makapaduda nga dunay hiwi nga binuhatan ang iyang bana sa pagdumala sa buhatan niini nga nakapatingkag sa dunggan sa publiko ug nakapakabig sa interest sa pipila ka mga pulitiko.
Matod ni Patricia nga lakip sa iyang nadiskobrehan mao ang dokumento sa banko, pipila ka mga kabtangan ug mga passbooks nga ubos sa pangalan sa iyang bana nga wala malakip sa 2016 nga SALN.
Gawas sa mga nahisgutang dokumento, mga vouchers sa Smartmatic, ang kontraktor nga nag- supply sa automated election system sa tuig 2010, 2013 ug 2016 nga national elections, ang nakaplagan usab ni Patricia.
Tungod niini, mitumaw ang mga pagduda nga dunay mga anomaliyang gihimo si Bautista atol sa piniliay, butang nga iyang hugot gipanghimakak.
“Wala po akong tinanggap na komisyon, kahit na isang kusing tungkol sa isang halalan. Totoo po iyun -- wala,” ingon niya sa interview sa ABS-CBN News.
Si Bautista mialegar nga usa ka pagpangilkil ang gihimo sa iyang asawa ug dili lang kay ang iyang pagkatawo maoy gidaot niini kon dili ang integridad ug ang kalimpyo sa niaging piniliay. Iya usab nga gipasumbingay nga gisakyan og mga pulitiko ang kagubot sa ilang pamilya.
Mahimong sakto si Bautista ning iyang pangagpas, pero di ang kagubot sa iyang pamilya ug ang pagsakay sa mga pulitiko maoy isyu dinhi kon di ang pagdiskobre niining mga dokumento nga magmatuod nga dunay anomaliya siyang nahimo.