“Bug-at ang problema ni Andy”
Nagkadako ang problema karon ni Comelec Chief Andy Bautista. Bug-at kaayo ang mga gibuhiang pamahayag og akusasyon sa iyang asawa. Bug-at usab ang mga ebidensiya nga iyang gipakita.
Apan ang pinakabug-at niining tanan – gitamnan og dakong pagduda ang mga tawo nga ang asawa ni Andy Bautista nagsulti sa tinuod.
Tiaw bay dakong kantidad nga kwarta ug ang dako niyang katungdanan isip hepe sa Commission of Elections maghatag na dayon sa dili maayo nga koneksiyon sa huna-huna sa mga tawo.
Labi na kay daghan ang nagtuo nga dunay dakong bayranay sa miaging piniliay.
Matod pa ni Atty. Lorna Kapunan, abogado ni Patricia Bautista, mga orihinal nga mga dokumento ang iyang nakita.
Buot ipasabot, orihinal nga mga passbook, vouchers ug uban pang mga dokumento.
Duna pay daghang cash nga nakita si Patricia nga lisod masabot og diin gikan.
Kining tanan magdugang sa pagduda nga nagsulti siya sa tinuod.
Dugay ra nga dunay problema ang kaminyuon nila ni Andy og Patricia Bautista.
2013 pa, matod ni Andy Bautista.
Apan miabot ang panahon nga dili na asawa og bana ang ilang pagtratar sa usa’g usa.
Miabot gyud ang panahon nga kontra na sila.
Og miabot gyud ang panahon nga nakagunit na gyud og mga ebidensiya si Patricia batok kang Andy.
Sanglit bug-at man kaayo ang mga pamasangil ni Patricia batok kang Andy, usa ra ang solusyon niini.
Angay nga imbestigahon kini.
Gani karon, si Senador Tito Sotto gusto nga buhaton kini sa Blue Ribbon Committee sa senado.
Gusto usab ni Cong. Harry Roque nga imbestigahon kini sa ubos balay balaoranan.
Korek, daghan ang gusto nga mo-papel sanglit nagtankaron ang tibuok nasod ug hasta ang tibuok kalibutan tungod sa ka-seryoso sa maong kontrobersiya.
Bakak og dili tinuod. Gama-gama lang ang tanan. Mao kini ang gibuhiang tubag ni Andy Bautista.
Midugang pa siya nga gipangayoan siya og 620 ka milyon ka pesos sa iyang asawa apan wala niya hatagi. Extortion, matod pa. Apan dunay tubag si Atty. Kapunan.
Ang 620 ka milyon maoy katunga sa sobra sa usa ka bilyon ka pesos nga ilang nakita nga gipanag-iya ni Andy.
Bale, nangayo si Patricia og katunga sa katigayonan sa iyang bana.
Susmaryosep.
Peke ang ubang mga dokumento, midugang pa siya.
Sa giingon nga offshore account, miangkon siya nga usa lang ang tinuod pero peke na ang uban.Unsa may sulbad niini? Maila na unya og kinsay nagsulti sa tinuod kon imbestigahon na kini.
Giunsa man pagpanag-iya ni Andy ang sobra sa 100 ka milyon nga balor nga katigayonan?
International lawyer si Andy Bautista sa America ug Hongkong sa wala pa siya mosulod sa gobiyerno.
Nahimo usab siya nga Chairman sa Commission on Good Government.
Unsay epekto niining maong intriga sa election protest nila ni Vice President Leni Robredo og kanhi senador Bongbong Marcos? Unsay epekto niini sa piniliay sa 2016 sanglit nakita man ang mga vouchers gikan sa Smartmatic nga kauban sa mga ebidensiya ni Patricia Bautista?