I just walk away
Gusto kong klaruhon ang giingon ni Noel. “What do you mean by that?”
Ning higayona, nagmahid ko sa akong mga luha. Kinsa man say di sakitan aning sitwasyona, uy? Kinsa man sab tingaling bayhana nga dunay dakong pagsalig ngadto sa iyang boyfriend unya diay, hilom kini nagluib niya, dulot gyud sa bukog ang bationg kasakit ug kahiubos.
“Iya nang gibahad nako, Helen, nga ilugon ko niya gikan nimo.”
Nakapanglingo ko. Wa ko motuo sa giestorya ni Noel.
“Sa imong pagtraydor nako, Noel, lisod ka nang katuhoan. Nikki is my best friend. Di siya makahimo sa pagtraydor nako. Aside from that, duna na siyay uyab, si Jeric. Nikki loves Jeric very much.”
“Nasayop ka sa imong pagtuo, Helen. Gisugot ni Nikki si Jeric aron magkaduol mi kanunay. Nakahibawo si Nikki kon unsa kami kasuod si Jeric.”
Kon tinuod pa nang imong giingon, Noel, nganong wa ka man mosulti ani nako, nganong karon pa man lang nga nakapamabdos ka kang Nikki? Nganong wa ka man motug-an nako nga duna diay
love nimo si Nikki?” Mikatawa ko, anang kinataw- nga way kadasig ug way kinabuhi.
“Magbuwag na ta, Noel. Di ko sa tawo nga bakakon ug duhay nawong!”
Wa ko na huwata ang tubag ni Noel. Nagdali kong mibiya niya. Sa didto na ko sa gawas sa canteen, nagdagan kong misulod sa duol nga comfort
room para sa mga babaye. Ug sa sulod, gipagawas ko pag-ayo ang kahuot sa akong dughan. Mihilak ug mihilak ko. Hangtod nga nauyog pagkusog ang akong mga abaga sa akong pagbakho.
Dihang miluag na ang akong dughan, gipahiran ko ang akong mga luha sa mata sa giandam kong panyo. Unya migawas ko sa CR. Hinay ang akong paglakaw paingon sa akong classroom. Hangtod naghapon, wa masulod sa akong hunahuna ang gileksiyon sa akong mga propesor sa akong mga subjects.
Nakadesisyon ko nga mobalhin og laing university. Gusto kong magpahilayo kang Noel. Kini ra ang nahunahunaan kong paagi aron makamove on ko ug makalimtan ko si Noel.
Usa ka hapon nga gikan ko sa eskuwelahan, ug naglakaw ko sa sidewalk sa Colon paingon sa huwatanan kog sakyanan sa pagpauli, nakita ko si Jeric ug Nikki nga morag naglalis.