Bugnaw ang mga anak

Dear Papa Joe,

Mag papa lang ko nimo bisan maguwang pa ko nimo. Ako diay si Wilfredo, 55 anyos, taga Cebu city. Buwag ko sa akong asawa sa dugay nang panahon, mag 20 na ka tuig human siya naminyo og Amerkano dihang nag tourist siya didto ug nag-TNT.

Ambot giunsa basta naminyo sila hangtod nga ni okay na lang sad ko ug nakakaplag sad ko og lain diri pero di mi kasado. Kon magkatiguwang na ta, dali na kaayo ta mahiubos. Akong mga anak tua na didto ug nakahuman na sila sa pagtungha ug nagtrabaho na ang usa kay duha man sila. Pero akong nabantayan nga lahi naman sila. Maayo lang makahinumdom, mo-message nako sa Facebook pero kasagaran ako ang mouna ug dugay pa mo reply kay busy.

Dili nako masabtan nganong uga na sila nako nga wala man nako sila pasagdi sa dihang diri pa sila. Sakit kaayo sa akong pamati nga maorag wa na sila kaila nako. Unsaon man nako para mabalik ilang pag mahal nako? Tambagi ko. WILFREDO

Wilfredo,

Sir, ang ako ra gyud masulti nimo nga ayaw lang na hunahunaa pag-ayo kay magkasakit na hinuon ka ana. Di man gud nato malikayan nga sa laing nasud lahi ang kultura didto kumpara sa ato. Basin sa imong pagtuo nauga na sila, pero para sa ilaha normal lang kadto. Basin naanad ka lang sa ilang pag-care nimo dihang diha pa sila nimo kay mga bata baya to, unya karon dagko na.

Well, kon tinuod man gani nga nausab na sila, mao nay giingon, Sir, nga lawman pa nato atong pasensya kay bisan unsaon, anak man na nato ug basin maka realize ra na sila puhon. Ang importante nga ikaw mismo di mawad-an og gugma nila. PAPA JOE