Si Dr. Joseph Najam, Jr.
Kanhi nag-alagad siya sa Cebu City Hospital ug may dakong suhol nga nadawat sa iyang pag-alagad sulod sa kapin sa tulo ka tuig. Hamugaway ang iyang kahimtang. Nakatabang siya sa iyang tiguwang ug biyuda niyang inahan. Siya ang nagpatungha sa iyang duha ka igsuon sa kolehiyo. Dihang nakatapos na ang iyang duha ka igsuon sa kolehiyo ug may mga trabaho na, nakahukom siya nga motrabaho sa usa ka ospital sa dakbayan sa Marawi. Tuyo niya nga makaplagan ang Muslim nga rebelde nga usa sab ka tulisan nga maoy nagpatay sa iyang amahan nga usa ka doktor.
Tuig kadto sa 2002. Nagusbat ang ilang pinuy-anan sa dakbayan sa Marawi. Mitunga sa ilang dapit ang armadong mga Muslim ug nagpaila nga mga rebelde nga sakop sa inilang grupo sa mga rebelde sa Minatay danao. May langyawng turista nga ilang gikidnap gikan sa usa ka dakong hotel. Nagpatuyang pagpabuto sa ilang mga armas. May usa ka rebelde mipusil sa iyang amahan nga kuyog niya. Naigo ang iyang amahan ug namatay. Ang rebelde nga mipusil sa iyang amahan gitawag sa iyang mga kauban, “Umar Muti, adto na ta!” Nahinumdoman niya ang maong ngalan.
Ania na siya karon sa dakbayan sa Marawi.ug nag-alagad sa ospital diin ang iyang amahan nakaalagad usab sa dugayng panahon. Kristiyano ang iyang amahan ug usa ka Muslim ang iyang inahan. Gibiyaan sa iyang banay ang Marawi tungod sa kamatayon sa iyang amahan. Nahisum-ok siya pagbalik sa maong dapit kay kadugo sa iyang inahan nga nagsugilon nga ang rebelde nga nakapatay sa iyang amahan buhi pa. Dili siya mahikalimot sa dagway sa miplawas sa iyang amahan. Wala siya malimot sa ngalan niini, Umar Muti, sakop sa banayng Muti nga mga rebelde.
Usa ka adlaw niana may lima ka batang Muslim, nga sa iyang banabana nag-edad gikan sa lima ngadto sa napulog usa ka tuig, miabot sa ospital. Nagsangkiig sila sa pagbaswat sa usa ka tiguwang nga pungkol; nagkadugo ang ulo ug lawas. Wala sila pasudla sa osapital kay mga kabos ug way sapi nga ika-deposito..
Diha siya sa gawas sa pribadong ospital niadtong higayuna, nagpahangin ug nagpahayahay tapos sa usa ka operasyon didto sa operating room. Tungod sa iyang sapot nga puti nailhan siya sa mga bata nga usa ka doktor. Miluhod sila sa iyang atubangan ug giumod ang ilang nawong sa yuta, nagpakiluoy.
“Luwasa si Lolo! Buta siya! Nadasmagan siya sa dakong trak de karga! Maluoy ka, Dok! Kaluy-a ang among Lolo!” Nanghilak ang mga bata. Mga pulong kadto nga Minuslim ug nahubad niya sa pinulongang Sugbuanon. Muslim ang iyang inahan ug makamao sab siya sa ilang pinulongan.
Sanglit naluoy siya, gidala niya ang tiguwang sa sulod sa ospital. Gihugasan sa mga katabang sa ospital ang ulo ug sa tiguwang nga nahumod sa dugo.
Dihang miduol siya sa gihigdaan sa tiguwang aron sugdan ang pag-atiman niini nahitiurok siya. Si Umar Muti! Misinggit ang iyang hunahuna. Gitutokan niya pag-ayo ang dagway sa pasyente. Nakapanglingo siya. Misantop sa iyang hunahuna ang tuyo niya sa pagpanimalos. Wala siya makalihok. Unya gidagpi ang iyang bukton sa nars. Napukaw siya.
“Dok, sugdan na nato ang operasyon sa iyang mga samad,” matod sa nars.
HALAWOM na ang kagabhion dihang nahiuli siya sa iyang panimalay. Gikapoy siya, apan gaan ug hayahay siyang nakapahuway sa iyang higdaanan. Nakaplagan niya ang kalinaw ug kahusay sa dakbayan sa Marawi. Siya si Doktor Joseph Najam, Jr., nga samag ngalan sa iyang amahan nga usa sab ka doktor. (KATAPUSAN)