GILAS BATOK CHINA
Mosagubang dayon og malisod nga tahas ang Gilas Pilipinas batok sa defending champion China sa pagsugod sa ilang kampanya sa 2017 FIBA Asia Cup karong alas 6:30 sa gabii (RP time) sa Beirut, Lebanon.
Ang Gilas ug China mao ang nag-abot sa finals sa katapusang edisyon sa kompetisyon niadtong 2015.
Daghang mga kakulian ang gisagubang sa Gilas sa ilang paghamag ning matag duha ka mga tuig nga kompetisyon.
Ang Gilas sulod lang sa duha ka mga semana nga nangandam ning maong torneyo kumpara sa ubang teams nga sulod sa daghang mga buwan ang gigahin sa ilang hugot nga preparasyon.
Gawas sa kuwang og preparasyon, ang Gilas nabalian sab og lig-ong mga haligi sa ilawom.
Ang naturalized player sa Gilas nga si Andray Blatche nakadesisyon nga dili moduwa sa torneyo gumikan kay nabalaka kini sa seguridad sa Beirut.
Unya pipila ka mga adlaw una magsugod ang torneyo, naangol ang Sugbuanong higante nga si JuneMar Fajardo.
Nikuyog man tuod si Fajardo sa Beirut apan labing seguro, aron lang maniid sa kapabilidad sa ubang teams sa rehiyon.
Giklaro ni Gilas coach Chot Reyes nga andam silang mokombati nga wala si Fajardo apan nanghinaot siya nga makaduwa ra ang pambatong sentro sa San Miguel Beermen.
Ang Gilas nahisakop sa Group B kauban ang China, Qatar ug Iraq. Adunay upat ka mga grupo ang kompetisyon.
Ang mopatigbabaw nga duha sa matag grupo mao ang makaabante sa quarter-finals.
Human sa group elimination, ang mopatigbabaw sa matag grupo deretsong makasulod sa quarter-finals samtang ang No.2 ug No. 3 magtinagakay aron ilugan ang nahabiling luna sa usa ka grupo alang sa quarter-finals.
Ang ubang mga miyembro sa Gilas mao sila si Jayson Castro, Calvin Abueva, Terrence Romeo, Japeth Aguilar, Fil-German Christian Standhardinger, Jio Jalalon, Matthew Wright, Carl Bryan Cruz, Raymond Almazan ug Gabe Norwood.