Horn mopatak-om sa iyang mga kritiko

Human nakadawat og mga pagsaway sa labing dako niyang kadaugan, si Australian Jeff Horn nagpanikad nga mopakaging na sab og balik sa boksing sa tibuok kalibutan.

Niadtong Hulyo 2 sa SunCorp Stadium sa Australia, si Horn miposte og unanimous decision batok sa grabe ka inilog nga si Manny Pacquiao aron ilugon ang World Boxing Organization (WBO) welterweight title.

Apan nakuwangan og unod ang kalampusan ni Horn gumikan kay kadaghanan sa mga boxing analyst ang nagtuo nga ang Pambansang Kamao sa Pilipinas mao ang angayang midaog sa away.

Nagkanayon si Top Rank boss Bob Arum, promoter ni Pacquiao ug Horn, nga ang fighting senator sa Pilipinas gustong makig-away og balik kang Horn. Andam sab si Horn niini. “I’m happy for a rematch, especially after all the flak I received before the second scoring came out,” matod ni Horn sa interbyu sa Sydney Morning Herald.

“Now it’s out, and I still receive people saying I didn’t win.”

Ang gitumbok nga “second scoring” ni Horn mao ang lima ka judges nga gikuha sa WBO aron mo- review sa away. Alang ning maong grupo, di Horn gyud ang midaog sa away.

Tinguha ni Horn nga patakang iyang mga kritiko pinaagi sa paglupig kang Pacquiao sa ikaduhang higayon.

“I’m willing to prove it again and beat him for the second time,” batbat ni Horn.

“I’m still proving a point. I’ve got to make sure I train just as hard. I never say I want a knockout, but it’s always easier if the fight ends before the 12th round.”

Matod ni Horn nga aduna pa siya’y ipagawas nga lain sa ikaduha nilang panagharong ni Pacquiao.