Ginebra 3-on-3 Cebu leg, Agusto 12

Ipahigayon ang Cebu leg sa Ginebra San Miguel Inc. 3-on-3 Basketball Tournament karong Agusto 12 sa Barangay Pasil Multi-Purpose Gym sa dakbayan sa Sugbo.

Ang torneyo alang sa dili professional nga mga basketbolista nga nag-edad og 18 ngadto 35 anyos ug kinahanglang himsog ang panglawas niini.

Ang mga nagpasiugda modawat lang og 16 ka teams nga langkuban og upat ka mga magduduwa matag usa.

Ang pangalan sa tanang teams gibasi sa apelyido sa mga personalidad nga adunay kalambigitan sa Brgy. Ginebra Gin Kings sa Philippine Basketball Association (PBA).

Kini mao ang Team Caguioa, Team Aguilar, Team Ferrer, Team Devance, Team Taha, Team Ellis, Team J. Cruz, Team Jaworski, Team Tenorio, Team Thompson, Team Helterbrand, Team Marcelo, Team Slaughter, Team Mercado, Team Mariano ug Team Cone.

Kasamtangang nagpadayon ang rehistrasyon.

Aron makaapil, ang matag team kinahanglang mopalit og mga produkto sa GSMI: upat ka mga botelya sa Ginebra San Miguel Frasco o 4x4 700ml; upat ka mga botelya sa GSM Blue Distilled o Flavors 700ml; upat ka mga botelya sa Primera Light Brady 700ml; duha ka mga botelya sa Ginebra Premium Gin 700ml.

Ang kampiyon sa Cebu leg makadawat og P4,000 ug usa ka kaha sa GSMI.

Ang first-runner adunay P3,000 ug usa ka kaha sa GSMI.

Ang national champion makakuha og P50,000, GSMI products ug GSMI trophy.

Mokuha og coverage sa torneyo ang CNN Philippines, Asenso Pinoy, SMC Media, TV5/PBA ug local medial outlets.

Alang sa dugang mga impormasyon, mahimong motawag sa 0908-818-7748 ug 0923-342-8193.