SEGURIDAD TUTOKAN
Sa pagbalik sa Don Sergio Osmeña Sr. Run karong tuiga, usa ka butang ang labing pagatutokan sa mga nagpasiugda – seguridad sa mga partisipante.
Kini nunot sa nahitabo sa Cobra Energy Drink Ironman 70.3 Philippines niadto lang Dominggo diin usa ka partisipante gikan sa Laguna ang namatay gumikan sa ataki sa kasingkasing.
Gipasabot ni race organizer Ricky Ballesteros nga bisan dili man tuod sama kalisod ang pagatahakon sa DSOS Run kumpara sa Ironman apan kinahanglan gihapon nilang magmatngon.
“We always value the safety of the participants pero sometimes dili nato mahibaw-an kay ang runners man gud ang nag-control sa ilang kaugalingon. During the run, mausab na man gud ang atong heartbeat,” pasabot ni Ballesteros kagahapon sa press conference sa Cebu City Sports Center. “Ang ako lang advice sa runners, If they feel dili na nila kaya, they have to stop.”
Nidugang si Ballesteros nga sama sa naandan, maghatag sila og waiver matag partisipante unya sa 21K open
category, kinahanglan nilang masusi ang kahimsog sa matag partisipante.
Si Cebu City councilor Jerry Guardo, deputy mayor for
sports sa konseho, nagkanayon nga ilang ipaneguro nga adunay igong mga ambulansya ug medical team ang ilang iandam atol sa lumba aron makaresponde dayon kon adunay insidente nga maghitabo. “Naa ta’y daghang mga ambulance ug medical teams nga i-andam. Ang safety and security gyud sa atong athletes ang atong bantayan,” matod ni Guardo.
Si Cebu City Sports Commission (CCSC) chairman Edward Hayco midugang nga gawas sa isyu sa kahimsog sa panglawas, kinahanglan sab nilang tutokan ang trapiko sa kadalanan nga delikado sab alang sa mga partisipante.
“Ato sab bantayan ang traffic and we will make it sure nga luwas ang atong runners sa road accidents,” batbat ni Hayco.
Ang DSOS Run gikatakda karong Septiyembre 9. Manukad kini sa Sergio Osmeña Marker sa Osmeña blvd. ug mahuman sa Cebu City Sports Center. Si Councilor Jun Gabuya,
co-deputy mayor for sports sa konseho, nagkanayon nga sa pagbalik sa DSOS Run, nga katapusang napahigayon niadtong 2010, mas dako ug mas mabulukong lumba ang ilang giandam.
Gipasabot ni Gabuya nga mas dagko ang premyo sa lumba kumpara sa kasagaran diin ang kampiyon sa 21K
open men’s ug women’s category mao ang makabira sa labing dakong tipak niini nga P20,000 matag usa.
Gawas sa 21K, ang ubang mga kategoriya nga kombatihan mao ang 10K nga adunay agegroup, 5K ug 3K (12 and under).
Nidugang si Gabuya nga daghan sab nga mga surpresa ang ilang giandam alang sa mga partisipante. Aduna sa’y piliong biggest delegation alang sa barangay,
company/running club ug school-based divisions.
Kagahapon gisugdan na ang rehistrasyon sa lumba sa CCSC ug sa opisina ni Gabuya.