'LIDER' SA MGA TULISAN NAPATAY

KAY ‘MISUKOL’ SA MANDAUE CITY POLICE

Giingong lider sa usa ka robbery group patay samtang laing 19 ka mga tawo ang nasikop sa kapulisan sa dakbayan sa Mandaue atol sa one-time big-time sa nagkadaiyang dapit sa dakbayan niadtong Martes.

Di mominos sa 90.84 gramos sa gituohang shabu nga mobalor og P1,067,664 ang nasakmit sa kapulisan sa nagkadaiyang operasyon sa maong adlaw.

Sa mga nadakpan, napulo niini ang nalambigit sa iligal nga drugas samtang ang uban gisikop nunot sa paglapas sa ubang balaud.

Matod ni PCInsp Mercy Villaro sa Mandaue City Police Office (MCPO) nga ang lider sa robbery group nga napatay mao si Ariel Parcon, alyas Lapad, 39, ulitawo, lumolupyo sa Sitio Teresita, Brgy. Jagobiao, sa dakbayan.

Dugang ni Villaro nga ang suspek maoy lider sa Lapad Robbery Group nga nag-operate sa Mandaue City.

Nasuta ning mantalaan nga ang suspek nakabantay nga pulis iyang nabaligyaan og usa ka pakete sa shabu maong kalit kini nga nibunlot sa iyang .38 revolver, apan naunhan kini og paboto sa kapulisan hinungdan sa iyang kamatayon.

Nakuha gikan sa posesyon ni Parcon ang tulo ka pakete sa gituohang shabu, duha ka P100 bill ug ang armas niini nga may unom ka mga bala.

Sigun pa ni Villaro nga di high value target sa dakbayan si Parcon apan posible kini nga high value target sa laing dapit.

Sa laing bahin, laing dakong bulto sa drugas nakuha gikan sa gituohang mastermind sa pagpusil ni Kapitan Antonino Maquilan sa Brgy. Mantuyong niadtong Mayo.

Duha ka medium pack sa gituohang shabu ang nakuha gikan ni Manuel Paz Baclohan, 45 anyos, sa Sitio Asinan Brgy. Mantuyong sa dakbayan.

Gawas sa drugas, nakuha usab niya ang usa ka kolor silver ug itom nga kalibre .45 nga armas nga may magazine ug lima ka buhing bala, usa ka yellow nga kalibre .45 nga armas nga may lima ka buhing bala ug magazine, usa ka puwa nga kahon nga may 17 ka P1,000 nga kwarta ug 20 a P100 nga kwarta.

Kini maoy ikaduhang onetime big-time nga gihimo sa MCPO ning buwana.

Sa miaging weekend, di mominos sa P7 milyones sa shabu ang nasakmit atol sa operasyon kapulisan. /