MAESTRO ‘MIHINOL’ SA IYANG TINUN-AN, NAPRISO

Magtutudlo sa usa ka priba- dong tunghaan sa kolehiyo sa syudad sa Sugbo gisikop human gireklamo sa iyang tinunan nga babaye nga nanghinol sa iyang pribadong parte sa lawas sud sa classroom niadtong Lunes sa hapon.

Natanggong sa Fuente police station ang 24 anyos nga magtutudlo.

Ang ngalan sa suspek gitago una sa kapulisan nunot sa hangyo sa kadagkoan sa tunghaan aron di mailhan ang unibersidad ug ang biktimang tinun-an.

Sa gihimong imbestigasyon sa Women and Children Protection Desk sa Fuente police station nasuta nga nahitabo ang pagmolestiya sa maestro niadtong Lunes sa hapon sud sa lawak sa laboratory department.

Matod ni Chief Insp. Ma. Theresa Macatangay, hepe sa Fuente police station, nga daghan ang gihaylo sa maestro sama sa grado niini ug uban pa.

“Ang bata pa reporton sa iyaha unya naay kondisyon no nga I- impose sa bata which is ang bata

hesitant gikuyawan kay maestro baya. So, adunay at the mercy of grades at the mercy of whatever,” matod ni Macatangay.

Human sa giingong pagpanghikap sa lawas sa dalaga, naghilak ni nga mipauli sa ilang balay ug gitug-an ngadto sa iyang ginikanan ang tanang gihimo sa iyang magtutudlo.

Niadtong Martes sa buntag ang ginikanan sa 21 anyos nipadangat ug reklamo ngadto sa tagdumala sa unibersidad ug dayong mando sa gwardya nga dakpon ang magtutudlo.

Ang WCPD mosusi kon wa bay pagpang lugos nga nahitabo sa pagtuo nga nahadlok pa karon ang biktima.

Nagduda si Macatangay nga di lang ang 21 anyos ang gibiktima sa maestro dungan sa awhag nga mopatim-aw sa ilang buhatan aron mapasakaag dugang kaso.