Gikatahapan nga pusher napatay sa PDEA 7
Gidudahang tigbaligya og shabu napatay sa mga operatiba sa Philippine Drug Enforcement Agency (PDEA) 7 sa Barangay Sambag 1, siyudad sa Sugbo, pasado alas 4 kagahapon sa hapon.
Giila ang suspek nga si Frederick Lavistre Villamala, usa ka drug surrenderer sa Oplan Tokhang.
Nagtuo ang kadagkoan sa PDEA 7 nga adunay koneksiyon si Villamala sa National Bilibid Prisons sa Muntinlupa City, diin usa ka inmate ang iyang amahan.
Nakadawat og kasayoran ang PDEA 7 nga adunay koneksiyon sa kapulisan si Villamala.
Si Villamala nagsakay sa iyang puwa nga awto sa dihang nakigtransak sa poseur buyer.
Sa dihang nakamatikod siya nga dakponon, nisuway siya og bangga sa usa sa mga operatiba.
Gipusil sa usa sa mga sakop sa PDEA ang tuong ligid sa atubangan hangtod wa na makadagan ang sakyanan.
Nigawas si Villamala bitbit ang iyang kalibre .45 nga pistola apan giunhan siyag pusil sa mga operatiba hangtod nahagba siyag balik sa sulod sa sakyanan.
Nakuha sulod sa sakyanan ang armas ug ang duha ka pakete nga gituohang naay sulod nga shabu.
Tulo ka mga babayeng kuyog ni Villamala giimbestigar sa PDEA 7.
Usa ka saksi niila kang Villamala nga usa sa mga nipusil sa usa ka car washer.
Ang state prosecutors wa morekomendar og piyansa kang Villamala human siya pasakai og murder niadtong 2015, apan gikatahong gi-dismiss kini kay ang pamilya wa mopadayon.