‘Utok’ sa pagpatay nadakpan; nanghimakak
Gihimakak sa gituohang mastermind sa pagpusil ni Kapitan Antonino Maquilan nga siya ang nagpaluyo sa krimen nga maoy hinungdan nga giatake ug namatay ang opisyal sa Brgy. Mantuyong, Mandaue City niadtong Mayo 3.
Kapin sa duha ka buwan human sa krimen, nasikop sa City Intelligence Branch sa dakbayan sa Lapu-Lapu si Manuel Paz Baclohan, 45, duol sa may simbahan sa St. Joseph.
Pasado alas dose sa may dalan Gomez, corner dalan S.B. Cabahug niadtong Martes, nasikop sa mga sakop sa CIB si Baclohan human may nitaho sa buhatan nga may armadong tawo sa dapit.
Matod niya nga higala niya ang kanhi kapitan ug wa silay away niini.
“Base sa atoang pag-conduct og investigation sa area, siya ang usa sa mga gipangtudlo (nga suspek). Yes, naa tay mga witnesses,” matod ni PCInsp. Mercy Villaro sa MCPO.
Nasikop si Baclohan samtang nagsakay og traysikad ug may nakakita sa pagbugdo sa armas sa iyang kilid.
“Nagsakay ni siya og trasikad unya nibugdo sa iyang hawak ang usa ka armas. Mao to gisita siya ug gipangayuan og pertinent document sa iyang armas. Sa iyang pagsud sa sikad, nagpurong siya og tualya. Sa pag-body search, nakuhaan siya og shabu,” ni Villaro.
Nakuha gikan niya ang duha ka medium nga pakete sa shabu, duha ka kalibre .45 nga armas nga dunay magazine ug 14 ka mga bala, ug P19,000 cash.
Sumala pa ni Villaro nga usa si Baclohan sa posibleng daghan pa nga nakaaway sa kapitan nga mga tindero nga napahawa sa Mantuyong, way labot pa niini ang kakompetensya niini sa negosyo.
Si Maquilan gipusil sa ridingnga suspek sa iyang paa ug namatay human kini giatake sa kasingkasing pagpadangat niini sa tambalanan.
Sumala pa ni Supt. Bernouli Abalos, hepe sa CIB, nga sukad sa hitabo, wa na makit-i pa sa Mantuyong si Baclohan ug nasuta nga kini nipuyo sa balay sa iyang bayaw sa Sitio Litob, Brgy. Calawisan, dakbayan sa Lapu-Lapu.
Apan depensa sa suspek nga nihawa siya sa Mantuyong human sa pahimangno sa iyang amahan nga adunay buot mopatay kaniya human gipusil-patay ang iyang igsuon Oktubre 30 sa milabayng tuig.
Giangkon niya nga nalambigit siya sa drugas niadtong mga 1990s apan nihunong kini sukad pa niadtong 1998.
Human sa iyang kalambigitan sa drugas, mas gitutukan niya ang negosyo nga baboyan.
Nitahan sa kapulisan sa milabayng tuig si Baclohan aron sa paglimpyo sa iyang pangan, matod niya.
Matod ni Villaro nga base sa ilang record, tulak sa iligal nga drugas ang suspek.
Matod ni Baclohan nga ang pusil alang sa proteksyon. /